Во саботата накратко беше затворен и воздушниот простор над американската сојузна држава Монтана, откако Северноамериканската воздушна одбранбена команда откри „аномалија на радарот“, испраќајќи борбени авиони да го истражат просторот
Воздушниот простор над езерото Мичиген во северниот дел на САД беше накратко затворен во неделата поради активностите на Министерството за одбрана и потоа е повторно отворен, објави американската Управа за цивилно воздухопловство (ФАА).
„ФАА накратко затвори дел од воздушниот простор над езерото Мичиген за да ги поддржи операциите на Министерството за одбрана. Воздушниот простор е повторно отворен“,
се вели во соопштението.
Во саботата накратко беше затворен и воздушниот простор над американската сојузна држава Монтана, откако Северноамериканската воздушна одбранбена команда откри „аномалија на радарот“, испраќајќи борбени авиони да го истражат просторот.
Над Северна Америка деновиве се соборени два неидентификувани објекти откако претходно САД соборија кинески балон над нивните територијални води кај Јужна Каролина.
Еден летечки објект беше соборен во петокот над Алјаска, додека друг беше соборен во саботата од американски борбен авион над канадска територија.
Администрацијата на американскиот претседател Џо Бајден во петокот стави на „црната листа“ шест кинески компании кои се поврзани со воздушните програми за набљудување на кинеската армија. Ваквиот потег следуваше по соборувањето на кинескиот балон за надзор што прелета над САД минатата недела.
САД велат дека балонот бил опремен да детектира и да собира разузнавачки сигнали. Од друга страна, Пекинг тврди дека се работи за цивилен балон за метеоролошки истражувања кој случајно навлегол во воздушниот простор на САД.