Зголемувањето на платите во високото образование за 10 отсто од 1 јануари годинава што го договорија Министерството за образование и СОНК пред Нова година, ќе се реализира со измени и дополнувања на Законот за исплата на платите, а не со формирање синдикати и потпишување колективни договори
На предлог на четворица пратеници, Собранието денеска ја утврди потребата од носење на измени и дополнувања на Законот за исплата на платите по скратена постапка. Предлог-измените и дополнувањата на Законот ќе овозможат да се спроведе договорот што пред крајот на минатата година го постигнаа Министерството за образование и СОНК за зголемување на платите за 10 насто, не само во основното и во средното, туку и во високото образование.
Станува збор за вметнување на само еден нов став со кој на јавните високообразовни установи им се дава можност да ги зголемат платите за 10%, почнувајќи од јануари оваа година. Со оглед на тоа што исплатата на платите се врши обично околу 15. во тековниот за претходниот месец, ако измените на Законот поминат во парламентот во следните денови, универзитетските професори и другите вработени во јавните универзитети ќе добијат плата за јануари повисока за 10 насто.
Во буџетот за 2020 г. се обезбедени пари за ова зголемување на платите во државното високо образование.
Иницираните законски измени значат дека е најдено решение за проблемот што се појави пред две недели кога синдикатите реагираа на писмата што ректорите ги испратија до факултетите со сугестии да формираат синдикални организации за да може да се потпишат колективни договори со цел да се исплати договореното зголемување на платите. За синдикатите (СОНК и НАКС) тоа беше класично кршење на законите преку мешање на работодавачот (ректоратите на универзитетите) во синдикалното организирање.
Од Министерството за образование, пак, објаснуваа дека „имајќи предвид дека не постои склучен Грански колективен договор за високото образование, согласно Законот за работните односи, единствениот начин за исплата на покачувањето на платите е да се склучи колективен договор на ниво на работодавач“.
поврзана вест* Борба за работнички права – академската фела „извиси“ за повисоки плати?