Во барањето за соработка кое австриската полиција, преку Европол, го доставила до нашето Министерство за внатрешни работи (МВР) има три лица кои покрај австриското имаат и државјанство од Северна Македонија. Сите тројца се родени во Австрија.
Барањето, како што веќе објавивме, пристигнало денеска, и се однесува на соработка и информации околу терористичкиот напад.
„Од списокот на австриската полиција, кој е доставен до повеќе полиции, меѓу кои и нашата, утврдено е дека три лица покрај австриското имаат и државјанство на Република Северна Македонија, и тоа К.Ф. (роден во Модлинг, Австрија), А.Г. (роден во Сент Полтен, Австрија) и У.А. (роден во Виена, Австрија). Секторот за меѓународна полициска соработка при МВР веднаш се стави на располагање на колегите од Австрија и интензивно соработуваме на сите елементи поврзани со овој случај“,
велат од МВР.
Иницијалите на момчето родено во Модлинг, наведени во одговорот од МВР, соодвестуваат со иницијалите на Кјутим Фејзулаи – името кое австрискиот министер за внатрешни работи Карл Нехамер го кажа соопштувајќи го идентитетот на 20-годишниот напаѓач кој беше убиен од полицијата.
Од МВР додаваат дека покрај тоа што Секторот за меѓународна соработка се ставил веднаш на располагање, премиерот Зоран Заев остварил и директна комуникација со австрискиот канцелар Себастијан Курц.
„Курц изрази благодарност до премиерот Заев за искажаната солидарност и поддршка. Премиерите изразија подготвеност да ја продолжат комуникацијата и соработката во врска со терористичкиот напад доколку австриските служби утврдат таква потреба“,
велат од МВР.
Информацијата дека убиениот напаѓач има потекло од Северна Македонија прв во јавноста ја објави австрискиот новинар Флориан Кленк.
„Родителите на осомничениот потекнувале од Северна Македонија и кај нив не била забележана поврзаност со исламизам. Полицијата немала сознанија дека осомничениот планира терористички напад“,
напиша новинарот на Твитер.
Во меѓувреме, медиумите на албански јазик објавија и дека една од жртвите во нападот синоќа е исто така со потекло од земјава. Станува збор за 20-годишниот Неџип Вренези со потекло од струшко Велешта.