Министерството за внатрешни работи денеска испрати апел до граѓаните да бидат претпазливи во комуникацијата со непознати лица бидејќи постојат измамници кои преку телефон лажно нудат услуги и потоа изнудуваат пари, главно од повозрасни лица, со измислени приказни за наводни сообраќајки на нивни блиски.
„Начинот на измама е со телефонско јавување на измамниците кај постари лица, при што ги доведуваат во заблуда со лажно прикажување на факти дека нивните син или ќерка предизвикале сообраќајна незгода во која е прегазено дете, а сторителот, лажно претставувајќи се како сведок или службено лице, им ветува дека за одредена сума на пари може да помогне наводниот учесник во сообраќајната незгода да не оди во затвор“,
објаснуваат од МВР.
Некои случаи одат дотаму што некое лице се претставува како близок на жртвите на измамата, при што ги убедуваат дека разговараат со него. На крајот, од жртвите бараат пари.
Од оперативни сознанија на МВР, измамниците на ист начин функционираат и во Бугарија и другите соседни земји. Притоа, се апелира сите сомнителни случаи веднаш да се пријават на бесплатниот телефонски број 192, а полицијата презема активности и мерки за пронаоѓање и санкционирање на пријавените сторители на измами.
МВР во повеќе наврати изминатиот период во извештаите информира за вакви случаи во различни делови од земјата.