Двајцата браќа, кои се внуци од брат на Али Ахмети, се пријавени бидејќи директорувале со фирма која копала варовник во Кичевско, но не уплаќале пари во државниот буџет согласно концесискиот договор
Пријавени се уште седум други лица, од кои петмина вработени во Министерството за економија и двајца во Државниот инспекторат за техничка инспекција, бидејќи пропуштиле да спроведат должен надзор и да утврдат – дека фирмата не си ги плаќа обврските
Министерството за внатрешни работи соопшти дека денеска поднело кривични пријави против вкупно девет лица. Врз основа на прибраните докази од страна на единицата за корупција при Одделот за сузбивање на организиран криминал, две лица кои биле директори на една иста кичевска фирма, но во различни периоди, се сомничат за злоупотреба на службената положба и овластување согласно член 353 од Кривичниот законик. На останатите седум лица, сите вработени во државни институции, им се става на товар дека сториле несовесно работење во службата според член 353-в од Кривичниот законик.
Накратко, полицијата тврди дека фирмата копала варовник кај кичевски Зајас согласно концесиски договор, ама не уплаќала пари во државниот буџет согласно договорот. Така, според МВР, направиле штета од околу 27 000 евра на буџетот. МВР поднесе кривична пријава против двајцата директори на фирмата. Едниот, Б. А., бил директор на фирмата од 2008 до 2017 година. Другиот, Д. А., е директор на фирмата од 2017 година досега.
Упатени извори од МВР потврдија дека зад иницијалите Д. А. стои Дрин Ахмеди, внукот на лидерот на ДУИ, Али Ахмети. По проверка на податоците во Централниот регистар бргу дојдовме до заклучокот дека станува збор за фирмата „Еверест ЏД“, каде што до 2017 газда и управител бил Бесиан Ахмети, а од 2017 досега и двете улоги ги презел неговиот брат, Дрин Ахмеди.
„Во период од 2016 година до 2023 година кривично пријавените постапиле спротивно на чл. 75 ст. 1, 2 и 3 од Законот за минерaлни суровини и чл. 11 од Договор за концесија за експлоатација на локалитет во општина Зајас, склучен меѓу правното лице и Владата на РСМ, претставувана од страна на тогашниот министер за економија. Истите биле должни да плаќаат точно утврден годишен надоместок за користење на просторот кој бил доделен со концесија за експлоатација и надоместок за експлоатирана количина на минерална суровина, пресметани согласно тарифникот за утврдување на висина на надоместоци за издавање на дозволи и концесии, како и да достават геодетски елаборати со пресметка на откопаните количини на минерални суровини, со прецизно наведени количини на откопана количина на минерални суровини и периодот во кој тоа е извршено, предвидено во чл.64 од Закон за минерални суровини, со што постапиле спротивно на Законот и одредбите од предметниот договор за концесија, и како потписници на сметка на правниот субјект исплатиле помалку концесиски надоместоци во вкупен износ од 1 671 894 денари, при што предизвикале штета и на Буџетот на РС Македонија“,
пишува во соопштението на МВР.
Така, според МВР, и Дрин Ахмеди и неговиот брат Бесиан, користејќи ги придобивките од концесијата која останала активна за цело време, биле во можност да бидат избрани како носители на договори за јавни набавки. Фирмата која ја воделе добила тендер од АД ЕСМ во висина од околу 125 000 евра со ДДВ и тендер во прилепски „Водовод и канализација“, во висина од околу 15 000 евра.
Во Економија молчеле
Согласно систематизацијата на работните места, надлежни да го следат концесискиот договор биле пријавените Ф. Ч., Е. Љ., Ј. К., А. М., и К. Ш.
„Истите пропуштиле да извршат должен надзор над реализација по основ на договор склучен помеѓу Владата на РС Македонија претставувана од министерот за економија и правното лице од Кичево, односно договор за доделена концесија за ископ на градежно-технички камен ‘варовник’ и без да утврдат дека концесионерот не доставувал геодетски елаборати со пресметка на откопаните количини на минерални суровини, предвидена во член од Законот за минерални суровини, како и дека не вршел исплата на концесиските надоместоци утврдено со склучениот договор, му овозможиле на правното лице да ги користи придобивките од концесијата и непречено да остварува приходи. Согласно горенаведеното, пријавените извршиле кривичното дело несовесно работење во службата предвидено во членот 353-в од КЗ“,
соопштија од МВР.
Според полицијата, одговорност има кај уште две лица со иницијали Ф. А. и Ф. Р. Тие се службени лица во Државниот инспекторат за техничка инспекција. Постапиле несовесно во службата бидејќи:
„Пријавените Ф. А. и Ф. Р. пропуштиле да извршат должен надзор и во записникот од извршен надзор не констатирале дека концесионерот во моментот не ги исполнувал законските обврски согласно чл. 62, ст. 1, ст. 2, ст. 3, ст. 4, и ст. 6, чл. 64 ст. 3, чл. 66, чл. 78, чл. 79 и чл. 104 од законот за минерални суровини, при што не му изрекле мерка за прекршок и му овозможиле на правното лице да ги користи придобивките од концесијата и непречено да остварува приходи, со што го извршиле кривичното дело несовесно работење во службата предвидено во членот 353-в од Кривичниот законик на Република Северна Македонија, а со тоа нанеле штета на Буџетот на РСМ“,
соопштија од МВР.
Кој е Дрин Ахмеди?
Тој е внук од брат на Али Ахмети. Неговото име не беше особено препознатливо сè додека не се појави како сопственик на една од двете фирми кои ја купија деловната зграда во центарот на Скопје, „Соравија“. Дрин Ахмеди беше газда на „Тхор индустрис“ ДООЕЛ, која се стекна со 39% од „Соравија инвест“ и 49 отсто од „Соравија менаџмент“ – двете компании преку кои се менаџира деловниот центар. Во јавноста веднаш се отвори прашањето, но немаше одговори – колку пари дал за да се стекне со тој удел. Али Ахмети, како што изјави младиот бизнисмен, „ми е чичко и тој е моја мотивација, но нема врска со мојот бизнис“.
Околку крајот на 2023 година, пак, Дрин Ахмеди беше запрен од полицијата, која му пронајде поголема количина пиротехнички средства во багажникот.
Пред овогодишните избори, Дрин Ахмеди најави дека во „Тхор индустрис“ влегува американска компанија.
Кој е Бесиан Ахмети?
Името на Бесиан Ахмети почна да се споменува јавно кога тогаш опозициската ВМРО-ДПМНЕ објави дека тој станал прв секретар во Амбасадата на РСМ во Брисел, но незаконски. Драган Ковачки тврдеше дека Бесиан Ахмети бил вработен во Министерството за економија по првпат во мај 2022 година и тоа на работна позиција – помлад соработник за мониторинг и следење на договорите за концесија за минерали. Само 10 месеци подоцна, бил преземен по пат на интерен оглас на кој се пријавил, па се префрлил во МНР.
Дел од медиумите, сепак, тогаш забележаа дека на својот професионален профил на „Линкдин“, Бесиан Ахмети има напишано дека бил избран за економски промотор на земјава во време кога технички премиер беше Емил Димитриев од ВМРО-ДПМНЕ. Новинарите не успеале и да ја потврдат информацијата, бидејќи дневните редови и одлуките на владините седници тогашната власт ги третираше како тајни.