Во неофицијален разговор, од МВР велат дека начинот за издавање на налепниците со кодот NMK е пропишан со правилник и дека таквиот начин на издавање и апликација на налепниците е за да не се прават злоупотреби, односно некој да не може да земе повеќе налепници одошто му се реално потребни
Наместо до 12 февруари 2024 година, налепниците со кодот NMK за регистарските таблички на возилата ќе може да се издаваат до крајот на годинава, заклучно со 31 декември.
Ваква одлука е донесена од страна на Министерството за внатрешни работи (МВР) преку измена и дополнување на правилникот според кој се издаваат налепниците со ознаката NMK. Измените на Правилникот, со кои МВР го пролонгира издавањето на налепниците за регистарските таблички до крајот на годинава, се објавени во вчерашниот број на „Службен весник“ со датум од 12 февруари. Со тоа, одлуката и официјално стапува во сила.
„Во Правилникот за формата и содржината на образецот на барањето за издавање на пробните таблици, формата и содржината на регистарските таблици и на пробните таблици на возилата, како и начинот и постапката на нивно издавање (‘Службен весник на Република Северна Македонија’ бр. 293/20, 114/23 и 26/24), во член 28 во ставовите (1) и (2) зборовите ,’12 февруари 2024 година’ се заменуваат со зборовите ’31 декември 2024 година’“,
гласи измената на Правилникот објавена во вчерашниот број на „Службен весник“.
За граѓаните да може да добијат налепница со ознаката NMK, потребно е со своето возило лично да појдат во некоја од станиците за технички преглед и да пополнат барање по што вработените се должни да ја залепат налепницата на соодветниот дел на регистарската табличка на возилото.
Засега е нејасно зошто за да добијат налепница со новиот код граѓаните мора лично со своите возила да одат до станиците за технички преглед. Нејасно е и зошто за самото аплицирање на налепниците на табличките се задолжени вработени во техничките прегледи наместо тоа да може да го прават самите граѓани.
„360 степени“ овие прашања ги постави во МВР, но оттаму засега нема официјален одговор.
Инаку, со измени во Правилникот за издавање на налепниците со кодот NMK од јуни 2023 година, единствено се пропишува на кое место од регистарската табличка се аплицира налепницата, но не и чија должност – дали на граѓаните или на трети лица – е самото нанесување на налепницата на табличката.
„На сите регистарски таблици кои ја содржат буквената ознака MK, се става налепница со идентична димензија како вертикално поставената ознака MK, на која е испишана националната ознака NMK. На сите регистарски таблици кои не ја содржат буквената ознака MK, во делот пред регистрационото подрачје се става налепницата на која е испишана националната ознака NMK“,
стои во измените на Правилникот донесен од МВР во јуни 2023 година.
Дополнително, во Правилникот се пропишани димензиите на налепниците за различни видови регистарски таблички, како и материјалот од кој се изработени – рефлектирачка фолија која е отпорна на временски услови и други надворешни влијанија.
