Според законските рокови, годинашниве локални избори би требало да се одржат во октомври, односно најдоцна до 17 тој месец. Сепак, земјава има забележително искуство со одложување избори, посебно локални, како што, на пример, беше во 2005 или во 2013 година, но од други причини
Ако до крајот на овој месец нема договор меѓу политичките партии околу набавката на скенери за отпечатоци од прст при гласање, локалните избори би можеле да се одложат за ноември, наместо да бидат во октомври, според предлогот на претседателот на Државната изборна комисија Александар Даштевски.
Даштевски изјави денеска дека во Собранието треба итно да се изгласаат измените на Изборниот законик, да се распише тендер за набавка на читачи, а потоа и меѓународен тендер поради високата сума, за што побрзо да се поврзат базите на податоци на граѓаните од МВР. Според него, парите за овој процес се обезбедени.
„Ако до крајот на март, почетокот на април, се договорат во работната група, може да се спроведе процесот за отпечаток од прст за гласањето, а нема ни друга алтернатива. Тоа е задолжително според Законот и ние не може да не го спроведеме. Од она што го слушаме постои политичка волја да се заврши таа работа“,
истакна Даштевски.
Даштевски апелира до партиите да се договорат навреме, за тоа да може да се имплементира.
Министерот за правда Бојан Маричиќ, кој денеска присуствуваше на настан во ДИК, рече дека во моментот кога ќе има консензус од сите политички партии тогаш ќе се спроведе собраниската процедура.
Според него, дилемите дали македонскиот систем е подготвен за ваков покомплексен изборен процес биле отворени од ДУИ. Несогласувањата се, како што посочи, околу изведбата на целиот процес, подготвеноста на системот за негово спроведување и на денот на изборите да бидеме сигурни дека ќе имаме минимални можности за проблеми и целиот тек да биде успешен за сите да бидат задоволни и никој да не ги оспорува резултатите.
Премиерот Зоран Заев изјави денеска очекува успешни локални избори, на кои идентификацијата на гласачите би била со отпечаток од прст. За наводите на ВМРО-ДПМНЕ дека владејачките партии барале враќање на УВ-лампата и на спрејот посочи дека тоа се однесувало на ридско-планински места и во ситуации кога нема интернет.
„Досега имавме избори без отпечаток од прст и тие беа легални. Се надевам дека претстојните избори ќе бидат со отпечаток и сакаме да се спроведе тоа, но треба да се има предвид дека Изборниот законик се менува со консензус – најмалку меѓу партиите што имаат свои членови во ДИК. Таа дилема треба да ја разјаснат работните групи за Изборниот законик, а јас се надевам на успешни избори во октомври со отпечаток од прст, со што ќе се зголеми довербата во изборните резултати“,
изјави Заев.
ВМРО-ДПМНЕ, пак, настапува со сомневања дека владејачките СДСМ и ДУИ подготвуваа изборна кражба, затоа што оневозможуваат да се спроведат измените во Изборниот законик, кои предвидуваат набавка на скенери за отпечатоци од прст, како метод за проверка на гласачите што би почнал од претстојните локални избори.
Годинашниве локални избори би требало да се одржат на 3 или 17 октомври, според најавите на претседателот на парламентот Талат Џафери, а согласно со роковите од Изборниот законик, за распишување и спроведување на изборните дејствија. Сепак, земјава има позабележително искуство со одложување избори, посебно локални, како што, на пример, беше во 2005 или во 2013 година, но од други причини