Според пратеникот на ВМРО-ДПМНЕ, владејачките партии ги растуриле преговорите за измена на Изборниот законик барајќи да се вратат во функција спрејот и УВ-лампата, наместо да се набават скенери за отпечатоци од прст
Пратеникот и доскорашен генерален секретар на ВМРО-ДПМНЕ, Игор Јанушев, изнесе денеска сомневања дека владејачките СДСМ и ДУИ подготвуваа изборна кражба, затоа што оневозможуваат да се спроведат измените во Изборниот законик, кои предвидуваат набавка на скенери за отпечатоци од прст, како метод за проверка на гласачите што би почнал од претстојните локални избори.
Јанушев побара посредништво од меѓународната заедница и посочи дека и таа има одговорност за спроведување на изборната регулатива која би овозможила фер изборен процес.
Тој рече дека во изминатиот период се воделе интензивни преговори меѓу работните групи на владејачките партии и на опозицијата во врска со користењето на уредите за скенирање отпечатоци од прст.
„Иако сите политички чинители дадоа поддршка пред една година, кога се донесоа последните измени на Изборниот законик, и покрај нашите настојувања да нема веќе гласање со ‘брзи прсти’, владејачката коалиција на сите можни начини ги опструираше преговорите и не сака да овозможи имплементација на овие законски обврски. Владата на СДСМ и на ДУИ, во буџетот за 2021 година, и покрај законската обврска, не предвиде средства за набавка на опремата, и покрај барањата на ДИК. Небулозни се тврдењата дека со сегашните измени на Изборниот законик, МВР не смеело да ја достави базата на податоци со отпечатоци од прсти. Треба само да го погледнете членот 43 од Изборниот законик за да видите дека МВР доставува до ДИК податоци и фотографии за граѓаните…“,
рече Јанушев.
Тој посочи дека ВМРО-ДПМНЕ, сепак, се согласила на промени во Изборниот законик, само за да се избегне „гласање со брзи прсти“.
„И кога бевме во напредна фаза и очекувавме дека ќе се постигне договор, од Владата беше доставено барањето да се вратат во употреба спрејот и УВ-лампата, иако овој член од Изборниот законик е ставен надвор од сила по завршувањето на предвремените парламентарни избори, со тоа што е предвидена задолжителна примена на уредите за отчитување отпечатоци од прст“,
рече јанушев.
Во тој контекст, тој праша дали целта на владејачките партии е да се овозможат семејно гласање и „бугарски возови“…
„ВМРО-ДПМНЕ инсистира на доследна примена на Изборниот законик. Одбивањето да се прифати електронскиот отпечаток е затоа што власта на Заев спрема кражба на изборите. Целокупната одговорност за тоа што ќе се случува е нивна, а ние нема мирно да седиме и да гледаме како крадат уште едни избори. Упатуваме апел и до меѓународната заедница да реагира и да не биде нем набљудувач, туку да изврши притисок врз власта да се почитува законот. Има седум месеци до изборите – доволно време да реагира и меѓународната заедница. Одговорноста е и на меѓународниот фактор, нема да дозволиме најкорумпираната влада во Европа да организира уште едни талибански избори“,
истакна пратеникот на ВМРО-ДПМНЕ.
Тој не даде конкретен одговор дали ВМРО-ДПМНЕ ќе учествува на изборите ако владејачките партии не се согласат да се набават скенери за отпечатоци и посочи дека прашањето не е дали се согласуваат или не се согласуваат, туку дека станува збор за законска обврска.