Партискиот потпретседател Мисајловски вечерва не даде прецизен одговор дали партијата размислува за неучество на редовните локални избори, во случај да не бидат набавени терминали за отисоци од прст
Наредната недела работните групи помеѓу партиите треба да почнат преговори околу Изборниот законик. Едно од барањата на ВМРО-ДПМНЕ, како што најави потпретседателот Владо Мисајловски во денешното гостување на Сител ТВ, ќе биде и еден изборен круг на локалните избори.
Меѓутоа, во јавноста излегоа и брифинзи од партијата дека би можеле да ги бојкотираат локалните избори што треба да се одржат наесен, доколку не се набават апарати за отпечатоци на прсти кои би се користеле на денот на гласање.
„Не треба да има бојкот зошто сум убеден дека ќе имаме победа во многу градови. Но штета е што си поигруваат со законот, зборувам за оној каде што пишува дека треба да се набават апаратчиња за отисок на прст. Има доволно време. Во законот стои дека власта мора да ги набави и на таков начин да се гласа и тука се сложни сите партии. Тоа не е пречка, пречка е што нема започнато постапка. Добро е што Министерството за финансии сака да излезе во пресрет, има средства да се набават овие апаратчиња. Добро е што и претходно СДСМ и сите политички партии имаа волја ова да се случи и има доволно време ова да се заврши“,
рече Мисајловски на Сител ТВ.
На конкретно прашање, дали ако не се набават апарати, опозицијата ќе ги бојкотира локалните избори, тој не даде прецизен одговор.
„Тоа е хипотетички ако не се набават. Ние треба како ВМРО-ДПМНЕ да ги ставиме на располагање сите наши структури, да имаме легални избори“,
рече Мисајловски обвинувајќи за поткут на минатите избори и за гласање на 2-3 секунди на референдумот што, според него, би се спречило ако има апарати за отисоци.
ВМРО-ДПМНЕ, вели, е подготвена за секакви избори, но ако власта не набави апарти тогаш според него, се спрема за фалсификат.
Во преговорите кои треба да почнат наредната недела, партискиот потпретседател навести дека ќе влезат со барање локалните избори да се спроведуваат во еден круг.
„За брзо време, наредната недела, ќе седнат работни групи да се договорат за Изборниот законик и за сите овие теми, некои се јавни, а некои не. Дел се барањата да има една изборна единица, отворени листи, исто така ние имаме едно барање локалните избори да бидат во еден изборен круг. Сето тоа ќе биде ставено во пакет за разговори. За да не даваме детали за она што ќе се случува, оставам на работните групи овие денови да се состанат и ќе ги известиме медиумите“,
нагласи Мисајловски.
Идејата за еден изборен круг на локални избори не е нова. Таа беше актуелна и минатата есен во пресрет на декемриските дополнителни избори за градоначалници во Штип и Пласница. Тогаш, лидерот на СДСМ, Зоран Заев, не ја отфрли идејата, но излезе со голема резерва.
Како што објаснуваше тогаш Заев, со избор на градоначалник во еден круг би можел да се доведе во прашање легитимитетот на локалните власти.
„Сакаме да ги разгледаме сите варијанти. Отворени сме за разговор за сите опции, но треба да се внимава да не ги нарушиме демократските процеси. Правото на глас, на одлука за тоа кој ќе биде пратеник, премиер, градоначалник, претседател е врвно право во демократијата на граѓаните. Ако тоа го скратиме и биде со неизразено мнозинство, на некој начин ја става под дискутабилност одлуката. Гледате дека еден дел од луѓето не излегуваат на избори, иако кај нас одѕивот е сепак малку поголем отколку во други држави. И кога ќе излезат така мал број луѓе, па ќе го пуштите првиот кандидат без 50 проценти гласови од оние што решиле да излезат да гласаат, тогаш е навистина дискутабилен легитимитетот“,
изјави Заев на 14 октомври 2020.
Изборите за градоначалници досега се спроведуваа во два изборни круга, иако во добар дел од општините завршуваа уште во првиот круг. За еден од кандидатите да однесе победа уште во првиот круг, според Изборниот законик, треба да освои мнозинство гласови од избирачите што гласале, но само ако на изборите излезат најмалку една третина од запишаните гласачи во одредена општина или во Градот Скопје. Ако ниту еден од кандидатите не ги исполни условите, се организира втор круг со двајцата најдобро рангирани кандидати, а победник е оној што ќе освои повеќе гласови.
Кога станува збор, пак, за ставовите на владејачкиот СДСМ во однос на другите прашањата околу Изборниот законик, досега се изразуваше поддршка и за една изборна единица и за отворени листи на локалните избори.