Според упатството за наставниците, средбите со учениците ќе траат од 20 до 30 минути, а на нив може да присуствуваат најмногу до 10 ученици
До 20 ноември треба да бидат формирани првите оценки за учениците, известија од Министерството за образование во соопштение до јавноста, во кое го опишуваат новиот начин на оценување што го наметна кризата со ковид-19.
Оценувањето може да биде комбинирано – наставникот да го оцени ученикот за неговото учење на далечина, а по потреба може да организира и средби со ученици, на кои ќе мора да се почитуваат мерките за заштита од ковид-19.
„Организирањето на повремените средби/часови со физичко присуство во училница за следење, поттикнување на учениците, проверка на постигнатото и за вреднување на нивните знаења во училиште има за цел: надополнување на празнини во учењето, поттикнување на дополнително/длабинско учење, грижа за социјалниот и емоционалниот развој на ученикот, вреднување практични вештини што тешко може да се демонстрираат во виртуелна училница“,
се вели во Упатството за наставниците за начинот на оценување на учениците.
Според Упатството за наставниците, средбите со учениците ќе траат од 20 до 30 минути, а на нив може да присуствуваат најмногу до 10 ученици.
„Овој пристап овозможува наставникот да му посвети доволно внимание на секој ученик и да ги согледа тешкотиите/предизвиците со кои се соочува во постигнување на резултатите предвидени со наставните програми“,
се вели во Упатството за наставниците.
МОН и Бирото за развој на образованието, во соопштение до јавноста, апелираат до наставниците да го приспособат оценувањето на учениците согласно учењето на далечина и додаваат дека наставникот може да направи табела за докази/продукти што ученикот ќе ги испрати како дел од електронското портфолио што ќе се оценува.
„Потребно е да се постават јасни насоки во врска со очекуваните резултати од учењето и начинот на следење, контролирање и вреднување на постигнувањата на учениците во овој период. Во рамки на формирањето оценка треба да се задаваат автентични задачи кои ја елиминираат можноста за готови одговори од наставните материјали или од други извори на информација, а во задачите со кои се проверува познавањето и разбирањето на фактите треба да се обезбеди контрола на времето за решавање на задачите, им препорачуваат на наставниците. Притоа критериумите за оценување, начинот на достава и роковите за достава треба да бидат јасно комуницирани до учениците и родителите“,
се вели во соопштението од МОН.
Од Министерството посочуваат дека учењето во виртуелна училница е предизвик, но велат дека тоа дава и можност да се направи исчекор во оценувањето и да се постават практики со кои понатаму ќе може да се унапредува образовниот процес.