Обезбедување поголем број тестови, кои ќе се прават во текот на еден ден во повеќе институции, набавка на нови брзи тестови, кои ќе даваат резултати за 15-ина минути, мобилизација на лекарите, се дел од чекорите што ќе бидат преземени во следните денови, со цел да се намали метежот за тестирање за ковид-19.
Ова денеска го најави министерот за здравство Венко Филипче, кој заедно со д-р Жарко Караџовски од Комисијата за заразни болести соопшти дека ќе се отворат дополнителни пунктови за земање брис.
„Се обезбедија дополнителни капацитети и број на тестови во повеќе институции. Граѓаните мора да покажат поголема свесност и да ги почитуваат мерките. В среда закажавме состанок со сите 56 приватни интернисти во државата, кои имаат договор со Фондот за здравствено осигурување, а половината од нив се во Скопје, за да може да се вклучат во системот на дежурства во сите болници каде што се лекуваат заболените од ковид-19“,
рече Филипче.
Тој додаде дека земјава се соочува со силен бран на коронавирусот, а ситуацијата ги оптоварува сите сегменти на здравствениот систем.
„Во модуларната болница до Инфективната клиника има слободни кревети. Направивме план за обезбедување дополнителни болнички капацитети, прво болницата во Козле, каде што има 40 кревети, каде што има кадар засилен со колеги од Инфективната клиника. Уште две одделенија се подготвуваат во ГОБ ‘8 Септември’ со кадарот што работи таму, а до крајот на денот треба тој план да го заокружиме за да биде подготвен и тој дел. Исполнети се болничките инфективни одделенија во другите градови“,
додаде Филипче.
Дополнително, информира дека на денешната седница на Владата е ставена информација со која ќе се овласти Министерството за здравство да го потпише и посебниот договор преку заедничкиот рамковен договор со ЕУ за набавка на лекот ремдесивир и, освен преку СЗО, тој од следниот период ќе биде достапен и преку оваа набавка.
„Разговаравме и за големата потреба за тестирање и за тоа се обезбедија дополнителни тестови во повеќе институции, односно со 350 повеќе тестирања во текот на еден ден. Во однос на најавената помош на респиратори од НАТО, 60 респиратори ќе пристигнат во земјава в петок, по што ќе бидат распределени соодветно во здравствените институции“,
рече Филипче.
Д-р Караџовски рече дека во употреба треба да бидат ставени и таканаречени брзи тестови, а од утре се отвораат и нови простории и уште едно приемно одделение, со што треба да се забрза процедурата на тестирање.
„Редот од овие 20-30 луѓе што чекаат нема да го има утре. Работиме и прва и втора смена, работиме по 16 часа за да го надминеме овој проблем. Луѓето грешат, сите доаѓаат во 8 часот наутро, и затоа се создаваат метежи“,
рече Караџовски.