„Во текот на вчерашниот ден беше повикан амбасадорот на Бугарија во МНР, каде што го изразивме високиот степен на незадоволство и нарушувањето на односите преку еден ваков гест и побаравме објаснување и темелна истрага од страна на соседна Бугарија како е дојдено до ваква ситуација“, изјави денеска министерот за надворешни работи и надворешна трговија Тимчо Муцунски
Муцунски вели дека е очигледно е оти постои една сериозна мрежа на онлајн страници на социјалните медиуми, ботовски мрежи, портали кои се занимаваат не само со претставници на државата, туку сè повеќе и со нивните семејства. Посочи дека се забележува, како што кажа, постојана опседнатост со семејството на претседателот на Владата, но исто така потсети и на лажните вести дека неговиот дедо бил бугарски војник
Бугарскиот амбасадор во земјава Жељазко Радуков вчера бил повикан во Министерството за надворешни работи и надворешна трговија на РС Македонија каде од него било побарано објаснување и темелна истрага од страна на официјална Софија за објавувањето на дипломатската нота во јавноста за патување во Пампорово на сопругата и помалиот син на премиерот Христијан Мицкоски.
Истовремено за случајот се известени и претставници на нашите стратешки партнери и НАТО, соопшти денеска на прес-конференција шефот на македонската дипломатија, Тимчо Муцунски, кој изрази сериозна загриженост за, како што кажа, ваквите постапки на Бугарија.
Инаку, на објавувањето на дипломатската нота, која е всушност известување од македонската амбасада во Софија до Министерството за надворешни работи на Бугарија за патувањето на членови на најтесното семејство на Мицкоски во Пампорово на почетокот на годината, вчера реагираше премиерот, кој рече дека станува збор за нејасни и неразумни потези кои доаѓаат од Софија и кои воопшто не одат во насока на подобрување на односите меѓу двете земји, туку, напротив, ги радикализираат.
„Во текот на вчерашниот ден беше повикан амбасадорот на Бугарија во МНР, каде што го изразивме високиот степен на незадоволство и нарушувањето на односите преку еден ваков гест и побаравме објаснување и темелна истрага од страна на соседна Бугарија како е дојдено до ваква ситуација“,
изјави денеска министерот за надворешни работи и надворешна трговија Тимчо Муцунски на прес-конференцијата на која даваше отчет за сработеното во изминатите две години откако раководи со институцијата.
Тој рече дека ваквото постапување е неприфатливо според меѓународното право во односите меѓу две држави, независно од тоа дали меѓу нив постојат тензии, па дури и да војуваат.
Како што наведе тој, безбедноста е прв приоритет и затоа за Македонија е неприфатлив начинот на меѓусебно фукционирање кога станува збор за движења на членови на семејства на државни функционери. Во тој контекст, Муцунски рече дека и на територијата на нашата држава постојано се случува да се движат членови на семејства на високи странски претставници, сами странски претставници, некогаш и во приватни цели, но никогаш не се случило таков документ да излезе во јавност.
„И доколку би се случило такво нешто, првиот чекор што би го направил е јас да се извинам на таа држава, бидејќи очигледно немало доволно висок степен на безбедност во рамките на институцијата. Второ што за мене е загрижувачко е што излегуваат лични податоци поврзани со сопруга на претседател на оваа влада и со малолетно дете“,
рече Муцунски.
Министерот потсети дека кога се случи инцидентот пред бугарската амбасада со палењето на возилата, министерството со кое раководи и тој веднаш го осудиле чинот, а инстутициите во држвава постапиле во најбрз можен рок и се воспоставила комуникација со претставниците на Бугарија.
Муцунски вели дека е очигледно е дека постои една сериозна мрежа на онлајн страници на социјалните медиуми, ботовски мрежи, портали кои се занимаваат не само со претставници на државата, туку сè повеќе и со нивните семејства. Посочи дека се забележува, како што кажа, постојана опседнатост со семејството на претседателот на Владата, но исто така потсети и на лажните вести дека неговиот дедо бил бугарски војник.
„Не го кажувам ова за некоја форма на оправдување. Мојот дедо е починат во 1997 година. Каков е тој однос на таа една цела медиумска мрежа која гради наративи со семејства на политичари. Слободно напаѓајте не нас. Оставете ги нашите семејства“,
рече Муцунски.
Инаку, дипломатската нота за која вчера реагираше Мицкоски, а како што денеска информира Муцунски и Министерството за надворешни работи, е известување од 6 јануари со кое македонската амбасада во Софија го информира Министерството за надворешни работи на Бугарија дека сопругата и еден од синовите на премиерот на 8 јануари ќе патуваат во Пампорово.
Дипломатскиот документ минатата недела беше објавен од група на социјалните мрежи, а вчера и завчера на него се повика веб-портал, кој во сугестивен наслов прави споредба меѓу ставовите на Мицкоски за спорот со Бугарија и патувањето на неговото семејство во Пампорово.
Во дипломатскиот документ, објавен од групата „Грубовци, Ениџе Вардар – родна Македонија“, покрај датумот на патувањето, е наведено приближното време кога сопругата и помалиот син на Мицкоски ќе ја преминат границата меѓу Македонија и Бугарија, како и детали за нивното обезбедување – имињата на неговите членови, возилата со кои патуваат, комуникациските уреди и вооружувањето што го носат со себе.
На денешната прес-конференција, шефот на македонската дипломатија говореше и за последните средби и дијалогот со официјалните претставници на Бугарија, наведувајќи дека во последниот месец комуникацијата меѓу двете земји има засилена динамика и оти смета дека тоа е добро.
„Соседни земји треба да комуницираат и на тие средби најголем дел од времето точно е поврзано суштински со предизвикот на нашиот европски пат, односно блокадата којашто Софија ја има поставено, но дискутираме и за другите. Мојата средба со министерката (Велислава Петрова-Чамова) ја сметам за корисна, средбата на претседателката со претседателката Јотова ја сметам за корисна. Вчера се слушнав со претседателот на Собранието, Гаши, и тој имал прилично корисна средба. Очигледно е дека по прашањето за европските интеграции имаме навистина различен став и различна интерпретација за тоа што се наши европски обврски, и треба да се најде соодветен механизам да се разјасни тоа. Но и за нас, што е битно, да се постават цврсти гаранции дека не треба да влеземе во еден постојан процес на билатерализација“,
рече Муцунски.
Повтори дека ставовите на Бугарија се дека уставните измени и Акцискиот план не се единствени прашања од билатерална природа што тие ги толкуваат како европски прашања.
„И токму тука лежи она за кое ние подолг период зборуваме, но токму тука лежи и она прашање за кое ние активно секојдневно работиме да најдеме решение за истото, бидејќи од една страна ние кажуваме не сме подготвени за вакви услови – да се движиме по пат којшто е непредвидлив и има ризик… И да се усвојат уставни измени и Акциски план, хипотетички, во рок од две недели повторно да се соочиме со иста ситуација“,
рече Муцунски.
Во таа насока шефот на македонската дипломатија потенцира дека Владата вложува максимален напор да изнајде достоинствено решение кое ќе трасира јасен и предвидлив пат кон полноправно членство во Европската Унија.
Муцунски рече дека Министерството за надворешни работи и надворешна трговија има определно кандидат за амбасадор во Софија од редот на професионалните дипломати од Министерството, но, како што кажа, сè уште не може да го соопшти неговото име.