За министерката за труд и социјална политика не е проблем што таблата, освен што го има старото уставно име, е напишана само на македонски јазик, што е спротивно на Законот за јазици
Министерката за труд и социјална политика Рашела Мизрахи денеска повторно застана на прес-конференција пред таблата со старото уставно име Република Македонија и порача дека друга табла во Министерството нема, дека ниту видела вербална нота од Грција ниту, пак, стравува дека поради овој нејзин потег ќе биде казнета.
„Јас не сум Мила Царовска. Јас сум Мизрахи. Тука никогаш не најдов банер со Северна Македонија. Ова е единствената табла на Министерството за труд и социјална политика и тука ќе се држат сите прес-конференции“, рече Мизрахи додавајќи дека ниту размислува да постави банер со друго име ниту стравува од последици кон неа и кон државата за непочитувањето на обврските од Преспанскиот договор.
„Какви последици? Кон мене? Од твит? Па јас немам Твитер. Или од вербална нота? Новинари, вие сте писмени, проверете што е тоа вербална нота, која јас никогаш не ја видов“, изјави Мизрахи коментирајќи ги реакциите од Грција на неспроведувањето на Преспанскиот договор.
Мизрахи, одговарајќи на новинарско прашање, негира дека објавила стари фотографии од нејзината претходничка со старата табла за да покаже дека друга табла во Министерството не постои, иако проверката што ја направи „360 степени“ покажа дека тие се направени пред да стапат во сила Преспанскиот договор и уставните измени.
Поврзана вест: Анализа: За таблата на Мизрахи и на Царовска
Исто така, Мизрахи беше прашана и зошто со старата табла го крши и Законот за јазиците, со тоа што на неа, освен старото име на државата, називот е испишан само на македонски јазик, на што таа само кусо одговори дека набавката на табла зависи од буџетот на Министерството.
„Ако кршам некаков закон, нека бидам казнета“, рече Мизрахи.
Министерот за надворешни работи Никола Димитров викендов на прес-конференција соопшти дека стигнала протестна нота од Грција, откако техничката министерка за труд и социјална политика ја врати таблата со старото уставно име на државата. Според Димитров, Мизрахи ги загрозила и интеграциските процеси на земјата и побара таа да биде разрешена.
Премиерот Оливер Спасовски вчера рече дека ќе разговара со министерката Мизрахи за да се запознае со фактичката состојба, а ако увиди дека партиските интереси се ставаат пред државните, ќе преземе мерки.
„Почитувањето на Уставот не е желба на кого било. Можете да искажувате ставови до донесувањето на одлуките, но во услови кога постои Устав, за негово почитување нема дебата. Сакам да поразговараме, да ги увидам фактите, но доколку не наидам на разбирање и не видам дека кај кој било министер националните и државните интереси се во прв план, пред партиските интереси, секако дека ќе преземам други мерки“,
изјави вчера Спасовски од Охрид.