„Грција во овој момент не е изолирана, Скопје е изолирано. И мислам дека на крај ќе сфатат дека оваа политика е безизлезна и верувам дека ќе се приспособат на притисоците што ќе им бидат извршени и мислам дека тоа е добро бидејќи ние сакаме добри односи со нашиот северен сосед“, изјави грчкиот премиер во интервју за телевизијата „Опен“
Доколку ги интересира да останат на европскиот пат, мислам дека нашите пријатели во Северна Македонија треба да сфатат дека заврши предизборниот период и веќе е дојдено време да станат сериозни и да го почитуваат меѓународниот договор, повторно порача грчкиот премиер Кирјакос Мицотакис, овој пат говорејќи за телевизијата „Опен“.
Договорот од Преспа, односите со нашата земја, ЕУ-перспективата, како и трите меморандуми кои произлегуваат од Договорот, а кои сè уште не се ратификувани од грчкиот парламент, беа дел од темите на кои Мицотакис се осврна во утринското интервју за телевизијата.
Во него тој, како што јави дописничката на МИА од Атина, детално говореше за сите актуелни теми во Грција, имајќи предвид дека земјата е во предизборен период за европските избори кои почнуваат на 9 јуни.
Говорејќи за прашањето за името на земјава, грчкиот премиер рече дека тие во никој случај нема да отстапат.
„Кога имаме прашања, како на пример со нашите северни соседи, ги решаваме со сериозност, јасно поставувајќи црвени линии, разјаснувајќи дека Договорот од Преспа треба да се почитува, иако не се согласувавме со многу негови аспекти и дека во прашањето за името ние во никој случај нема да отстапиме. Името на земјата е Северна Македонија и сè додека некои продолжуваат да ја именуваат Република Македонија да знаете дека ќе бидеме наспроти нив“,
рече Мицотакис.
Говорејќи во таа насока, тој посочи дека прашањата во Договорот што се однесуваат на името не се менуваат, но додаде дека постои можност да се разговара за иднината на договорот. Дополнително, грчкиот премиер, кажа дека она што тие можат да го сторат е да извршат голем притисок врз Скопје и врз власта да сфатат дека оваа политика на крајот ќе ги одведе во меѓународна изолација.
Мицотакис во овој контекст не ја исклучи можноста и од големи меѓународни притисоци, притоа навраќајќи се на реакциите кои уследија од ЕУ веднаш по инаугурацијата на новата претседателка на државава, за кои рече дека биле резултат на грчките интервенции. Во таа насока, тој посочи дека во овој момент Грција не е сама.
„Грција во овој момент не е изолирана, Скопје е изолирано. И мислам дека на крај ќе сфатат дека оваа политика е безизлезна и верувам дека ќе се прилагодат на притисоците што ќе им бидат извршени и мислам дека е добро тоа, бидејќи ние сакаме добри односи со нашиот северен сосед, вчера бев во Лерин, соседна земја е, ние инвестираме во Северна Македонија“,
рече Мицотакис за „Опен“, пренесе МИА.
Во врска со меморандумите што сè уште не се ратификувани од парламентот, тој уште еднаш го повтори ставот дека на Грција ѝ се потребни дополнителни преговарачки оружја, а токму трите протоколи, според Мицотакис, ја засилуваат грчката позиција и се дипломатско оружје.
За ставот на Сириза дека со ратификацијата позицијата на Грција би станала посилна, Мицотакис рече дека токму спротивното би се случило бидејќи со тоа Скопје би добило аргумент да продолжи да го прави истото.
Реакциите од грчка страна се интензивираа по инаугурацијата на претседателката Гордана Силјановска-Давкова, како и по изјавата на лидерот на ВМРО-ДПМНЕ, Христијан Мицкоски, кој рече дека негово човеково право е својата држава да ја нарекува како што сака, и покрај тоа што, како што рече, употребата на уставното име во комуникацијата во и меѓу институциите останува согласно законските одредби.
Инаку, претседателката Сиљановска-Давкова во своето прво обраќање на јавен настан вчера вечер, не го спомена уставното име на државата. Таа одржа говор на свечената академија по повод одбележувањето на 75-годишнината од основањето на Универзитетот „Св. Кирил и Методиј“ (УКИМ) во кој во два наврати зборуваше за „македонската држава“, а во еден момент на почетокот од говорот рече „одбележуваме 75 години од формирањето на Универзитетот ’Св. Кирил и Методиј’, а прославуваме и 80 години асномска Македонија“.
Во меѓувреме, заменик-помошникот секретар на САД во заминување и специјален претставник за Западен Балкан, Габриел Ескобар, во онлајн интервју за Европскиот центар на Атлантскиот совет, изјави оти САД очекуваат дека Северна Македонија ќе продолжи по европскиот пат и дека за тоа добиле уверување од сите нивоа на партиското раководство на главната партија (ВМРО-ДПМНЕ н.з.) која победи на изборите дека ќе остане посветено на тој пат.
На прашањето дали по победата на ВМРО-ДПМНЕ и зголемената загриженост за Договорот од Преспа сè уште верува оти патот кон Европа ќе продолжи, како што изјави на денот на изборите, Ескобар рече:
„Да. Мислам дека Европа и САД многу јасно ја кажаа нашата позиција на претседателот по инаугурацијата дека целосно очекуваме оти Северна Македонија ќе продолжи по својот европски пат, ќе се посвети, ќе продолжи да биде посветена членка на НАТО и, верувајте ми, тие се посветена членка на НАТО. И добивме уверување од сите нивоа на партиското раководство на главната партија (ВМРО-ДПМНЕ н.з.) која победи на изборите дека ќе остане посветено на европскиот пат“.
Тој нагласи дека всушност постои сè поголем реализам дека нема друга алтернатива.