Во судски процес потврдени се криминалните шеми и злоупотреби на Никола Груевски, а на тој истиот Груевски, Христијан Мицкоски му беше десна рака, советник во Владата, а потоа и генерален секретар во партијата, стои во реакцијата на СДСМ по денешната пресуда за случајот „Плацови на Водно“ во кој експремиерот Груевски е осуден на казна затвор од седум години за перење пари и противправно стекнување и прикривање на имот
По сето ова, како што додаваат од Социјалдемократскиот сојуз, Мицкоски треба да си поднесе оставка
Уште еднаш е потврден криминалот на ВМРО-ДПМНЕ и Никола Груевски кој е осуден на казна затвор од седум години, реагира Социјалдемократскиот сојуз во врска со денешната пресуда за случајот „Плацови на Водно“ во кој експремиерот Никола Груевски е осуден на казна затвор од седум години, за перење пари и противправно стекнување и прикривање на имот.
„Во судски процес, потврдени се криминалните шеми и злоупотреби на Никола Груевски, шефот на Христијан Мицкоски. Перење пари, противправно богатење, криење имот па дури и злоупотреба на пари од членови на ВМРО-ДПМНЕ“,
стои во реакцијата на СДСМ.
Криминалот за којшто има судска пресуда е правен и во 2015 година, велат од СДСМ, период кога Христијан Мицкоски му бил советник на Никола Груевски. На тој истиот Груевски, додаваат од партијата, Христијан Мицкоски му беше десна рака, советник во Владата, а потоа и генерален секретар во партијата.
„Во ВМРО-ДПМНЕ нема никаква промена, не слушнавме ниту оградување, ниту извинување до граѓаните ниту пак некогаш Мицкоски повика на одговорност“,
заклучуваат од СДСМ.
Како што додаваат од партијата, по сето ова, Мицкоски треба да си поднесе оставка.
Три затворски казни и две условни казни изрече денеска судечкиот совет на чело со судијата Илија Трпков во случајот „Плацови на Водно“. Казните за обвинетите се:
- Никола Груевски – 7 години затвор
- Сашо Мијалков – 1 година и 3 месеци затвор
- Јордан (Орце) Камчев – 1 година затвор
- Ристо Новачевски – условна казна односно две години затвор кои нема да се извршат ако во рок 5 години од правосилноста не стори ново кривично дело
- Ненад Јосифовиќ – условна казна, две години односно две години затвор кои нема да се извршат ако во рок 5 години од правосилноста не стори ново кривично дело
- Ратка Куновска-Камчева – ослободена од обвинение со оглед дека обвинението за неа е застарено.
Покрај казните, судот изрече конфискација на сиот имот, односно два стана на „Бихаќка“ ( соседните станови каде што живееше Груевски), плацовите на Водно со површина од околу 11 000 квадратни метри, две парцели во Крушево и трите стана во „Панорама Резиденс“ со вкупна површина од околу 750 квадратни метри. Обвинителката Лиле Стефанови рече дека конфискацијата е особено важна во овој случај и нагласи дека во моментот пазарната вредност на сиот овој имот е околу три милиони евра.
Груевки, пак, дополнително доби и парична казна од 3 500 евра.
Пресудата не е правосилна и странките имаат право на жалба до Апелацискиот суд во Скопје.
Сите обвинети, освен Груевски кој е во бегство, со нивните адвокати дојдоа во судница за да ја слушнат судската одлука. Во судницата при читањето на пресудата, на монитори се прикажуваше и шема како се движеле парите кои потекнуваат од донации во ВМРО-ДПМНЕ, а потоа биле пуштани преку офшор фирми. Судијата Илија Трпков, ваквата графика ја нарече „Белизе шема”.
Во меѓувреме, обвинителката Лиле Стефанова рече дека е задоволна што се докажала тезата на обвинителството, но и дека во предметот од особена важност е што Основниот кривичен суд во Скопје изрече конфискација на имотот. Како што додаде таа, имотот денес има поголема пазарна вредност од претходно односно тежи три милиони евра.