Иако вредноста на имотот е запишана помалку, денеска според обвинителката, пазарната вредност достигнува вкупна сума од околу три милиони евра
По изрекувањето на пресудата за случајот „Плацови на Водно“, обвинителката Лиле Стефанова рече дека е задоволна што се докажала тезата на обвинителството, но и дека во предметот од особена важност е што Основниот кривичен суд во Скопје изрече конфискација на имотот.
Тој денес, вели таа, има поголема пазарна вредност од претходно односно тежи три милиони евра.
„За мене од особена важност е изречената конфискација, а сметам дека тоа е од важност за целото општество бидејќи од износите кои ги слушавте, а ги читаше судот, имотите беа евидентирани со пониски износи, но во моментов трите стана во ’Панорама резиденс‘, два стана на Бихаќка, градежното неизградено земјиште на Водно со површина од 2 700 метри квадрати, имотот во Крушево, и земјиштето кое беше конфискувано, а по кое и овој предмет го доби името Плацови на Водно, во моментов вредат околу три милиони евра“,
изјави Стефанова пред новинарите.
Со пресудата, експремиерот Никола Груевски, како првообвинет за делата перење пари и за противправно стекнување и прикривање на имот доби 7 години затвор. Неговиот братучед и поранешен шеф на УБК, Сашо Мијалков 1 година и 3 месеци затвор, Јордан (Орце) Камчев 1 година затвор, а Ристо Новачевски и Ненад Јосифовиќ добија условни казни од две години затвор кои нема да се извршат ако во рок од пет години од правосилноста на пресудата не сторат ново кривично дело. Во случајот обвинета беше и мајката на Камчев, Ратка Куновска-Камчева, но поради застареност на обвинението за неа, таа доби ослободителна пресуда.
Пресудата со која беа изречени казни и конфискација, не е правосилна и странките имаат право на жалба до Апелацискиот суд Скопје.
На чие име е имотот за кој првостепениот суд изрече конфискација
Плацовите на Водно во месноста Шербетница, по кои овој случај го доби и името, во моментов се на фирмата „Лајф кеар центар“ која од Камчеви ја купи семејството на бизнисменот Сергеј Самсоненко.
Во завршните зборови, адвокатите на Камчев бараа тие да не бидат конфискувани бидејќи рекоа дека се докажало оти луксузните станови во „Панорама резиденс“ се всушност ќарот од кривичното дело на Груевски, додека земјиштето на Водно кое го купиле Камчеви легално е препродадено на Самсоненко.
„Ако помине ваквата конфискација, несомнено, правните лица ќе се најдат во незавидна ситуација каде ќе треба да вратат парични средства кон трето лице, а факт е дека имаме уреден и целосно исплатен договорен однос“,
рече еден од неговите адвокати, Гоце Ристовски, во завршните зборови.
Сепак, судот со првостепената пресуда одлучи сиот имот да се конфискува и за овие парцели судијата Илија Трпков наведе дека биле продадени и покрај тоа што фирмата „Лајв кеар центар“ била запознаена со фактите.
Ексклузивните станови во „Панорама резиденс“, пак, во моментов се водат на име на фирмата „СС Инвестмент“ која е во сопственост на Мето Стојчевски, зетот на Камчев. Камчев за овие станови кога даваше одбрана кажа дека Груевски ги трампал за земјиштето на Водно. Тој тврдеше дека не сакал да ја крие сопственоста на Груевски врз нив и за таа цел, на негово барање до експремиерот, се обезбедила фирма која ќе биде соизведувач во изградбата на зградата.
„Фирмата која тој ја договори беше договорено потоа да го врати уделот, а за истиот да земе надомест 750 квадрати станови кога ќе се издадат имотни листови“,
рече Камчев во својата одбрана додавајќи дека имотните листови се издадени во 2020 година.
Парцелите во Крушево, пак, се на име на Ристо Новачевски, кумот на Груевски од првиот брак. Тој кажа дека по желба на кумашинот Груевски учествувал во аукцијата за ова државно земјиште и ги купил за него.
Двата стана на Бихаќка, пак, кои се соседни на останатите два каде Груевски живееше со своето семејство, според тоа што можеше да се слушне во судница во текот на судскиот процес биле купени исто така, за експремиерот преку бизнисменот Александар Ивановски – Алек Теранова.
Ивановски кога сведочеше пред судот кажа дека по молба на Мијалков била формирана фирма „ИКТ инженеринг“ за да се купи уште една парцела на Водно која исто така е запленета, а потоа преку истата е купен и еден од двата стана на Бихаќка. Како основач на фирмата била секретарката на Ивановски, Татјана Стојановска. Алек Теранова во сведочењето зборуваше и за вториот стан кој бил купен на лично име на секретарката, а по молба на Мијалков.
„Во 2008 година бев замолен од Сашо да најдам лице од доверба за да може да купи стан за Груевски, а де факто тој стан да не биде на негово име туку на некој друг. Парите беа дадени најверојатно од господинот Груевски или не знам од кој. Станува збор за сума од 40 000 евра“,
рече Ивановски во неговото сведочење на 28 октомври лани.
Груевски, пак, како и за другиот имот и за становите, преку објави на социјалните мрежи отфрлае секако поврзаност и тврдеше дека ги изнајмува и дека имал договор за закуп.