За разлика од СДСМ, ВМРО-ДПМНЕ досега немала настап со „шпицен-кандидат“, како што Мицкоски го нарекува моделот според кој партискиот лидер не би бил кандидат за пратеник
Во врска со содржината на „бомбите“ во кои се јавува Милошоски и дали е прифатливо пратеник да се јавува на судија за да се распрашува за пресуда за свој близок, Мицкоски кажа дека за него лично тоа е неприфатливо
Лидерот на ВМРО-ДПМНЕ порача денеска дека не е расположен да биде кандидат за пратеник, ниту носител на листа на престојните избори, затоа што, како што вели, е доследен на идејата за „шпицен-кандидат“ за мандатар за состав на идната влада. Сепак, тој вели дека за конечен одговор на прашањето дали ќе се кандидира на изборите, како и кои ќе бидат кандидатите за пратеници на ВМРО-ДПМНЕ, јавноста ќе мора да почека до вторник, кога ќе завршат внатрепартиските процедури за номинирање.
„Јас сум човек што не ги менува тoлку лесно ставовите и немам намера да го сменам ставот поврзан со таканаречениот кандидат за мандатар на владата. Милам дека луѓето во животот треба да се определат за една работа. Не можеме ние да се определуваме за повеќе работи, па која ќе помине, таа нека помине. Ако вие бидете и кандидат за мандатар и потенцијален кандидат за пратеник, за директор, за министер, за амбасадор…, тоа, според мое убедување, е затскривање позади пораз. Најмалку политичарите кои се кандидати за мандатар треба да го користат пратеничкиот имунитет како падобран за спасување“,
изјави Мицкоски.
Тој вели дека задутре ќе заседава Централниот комитет на ВМРО-ДПМНЕ и тогаш ќе дознае јавноста кои се кандидатите за пратеници на неговата коалиција. Во однос на родовата застапеност на листите, рече дека одбива да зборува за проценти.
„Јас сакам секогаш да зборувам за квалитет и сакам секогаш да работам во насока на зголемување на тој квалитет, не во насока на тоа бројките да ги поместуваме полево, подесно, погоре или подоле. Овде бројките се дефинирани со закон и ние ќе мораме согласно тој закон да постапуваме, односно помалку застапениот пол да биде 40 проценти, повеќе застапениот пол да биде 60 проценти. Сега не значи дека 40 проценти ќе биде помалку застапениот пол, токму понежниот. Можеби посилниот пол ќе биде помалку застапен на тие листи. Уште сме во финална фаза на составување на содржината на тие листи, реков до вторник ќе ги има“,
рече Мицкоски.
И Мицкоски не кажува дали ќе даде оставка ако изгуби на изборите
За профилите на кандидатите за пратеници, Мицкоски вели дека ВМРО-ДПМНЕ предложила натпартиски кандидат за претседателка на државата и дека такви личности ќе има и сега на листите. На прашањето дали смета дека тој што ќе ги изгуби парламентарните избори треба да си поднесе оставка, Мицкоски вели дека тоа прашање ќе треба да му се постави на Зоран Заев ноќта на 12 април, а дека нему ќе треба да му се постави прашање кои ќе бидат министри во идната влада на ВМРО-ДПМНЕ.
*Поврзани вести: Заев ја смени реториката: Не размислува за оставка зашто не планира да ги изгуби изборите
СДСМ потврди: листите на коалицијата ќе ги предводат машко-женски тандеми
Мицкоски без стаж во законодавната власт
За разлика од СДСМ, ВМРО-ДПМНЕ досега немала настап со „шпицен-кандидат“, како што Мицкоски го нарекува моделот според кој партискиот лидер не би бил кандидат за пратеник, туку само кандидат за состав на идната влада. Тоа би значело дека, во случај на изборен пораз, партискиот (опозициски) лидер нема да биде дел ниту од законодавната власт, како што беше случај и во овој парламентарен состав, по доаѓањето на Мицкоски на чело на партијата.
Претходниот лидер на ВМРО-ДПМНЕ Никола Груевски редовно беше носител на листа, почнувајќи од 2002 година, а од 2006 до 2014 г. се повлекуваше од пратеничкото место за да биде премиер. Мицкоски, пак, никогаш досега не бил кандидат за пратеник, освен што беше носител на листата на ВМРО-ДПМНЕ за Советот на град Скопје во 2017 година, по што се повлече од советничкото место.
Затоа, пак, СДСМ, во изминатиот период има искуства, кога партискиот лидер не бил кандидат на парламентарни избори. Заев, како и целото раководство на СДСМ, не беше на кандидатските листи на парламентарните избори во 2014 година. На неодамнешниот ТВ-дуел со Мицкоски, Заев оцени дека тој потег подоцна се покажал како лошо решение и како изземање од одговорност. Претходно, на изборите во 2011 година, тогашниот лидер на СДСМ Бранко Црвенковски, исто така, не се кандидираше за пратеник, а не беше ниту кандидат за премиер.
За „бомбите“…
Мицкоски денеска рече и дека се лага и манипулација изјавите на лидерот на СДСМ, Зоран Заев, дека материјалите објавени на Јутјуб за разговор на пратеникот Антонио Милошоски, во кои тој се интересира за пресуда на Врховен суд за неговиот татко, се нови материјали.
Според него, станува збор за нелегално стекнати материјали кои требало да завршат во СЈО, а биле пуштени преку Јутјуб каналот за, како што вели, да се тврди дека СДСМ не ги пуштиле бомбите.
„Претпоставувам ќе продолжат и понатаму на Јутјуб да се појавуваат вакви снимки. Претпоставувам дека имаат некои работи недокажани со Милошоски. Во периодот што следи ќе имаат можност да си кажат многу работи и едниот и другиот. Најдобро би било, бидејќи бега од мене да излеземе на повторно соочување, барем да прифати со Милошоски да си продискутираат“
рече Мицкоски.
Неприфаливо е пратеник да се распрашува за пресуди
Во врска со содржината на „бомбите“ во кои се јавува Милошоски и дали е прифатливо пратеник да се јавува на судија за да се распрашува за пресуда за свој близок, Мицкоски кажа дека за него лично тоа е неприфатливо.
„Милошоски си даде коментар поврзан со текстот на тие нелегално стекнати материјали на фејсбук-профилот. Немам што да додадам, ниту да одземам. За мене лично е неприфатливо да може високи официјални лица во државата – политичари, премиери, кој било друг, да интервенираат кај судии, да издејствуваат одлуки на врховни судии, да може да интеревираат преку познанства и пријателства, да обезбедуваат средства за финансирање медиуми… Политичарите треба да бидат надвор од интервенциите во судството“,
рече Мицкоски.