Лидерот на СДСМ смета дека партнерството со Беса е добитна комбинација. Сепак, остава простор и за разговори со лидерот на ДПА во наредните денови, за евентуално проширување на коалицијата
Заев одбива дуел со Мицкоски на ТВ Алфа, поради случајот „унгарски пари во медиумите“
Лидерот на СДСМ, Зоран Заев, на денешната прес-конференција, во неколку наврати избегна конкретен одговор на новинарско прашање дали би поднел оставка на партиската функција во случај да ги изгуби изборите. Неговиот одговор беше дека нема шанси коалицијата на СДСМ да доживее пораз на претстојните избори.
„Не ни помислувам да ги изгубам изборите. Нема потреба од оставка. Сепак, народот ќе си го каже своето. Граѓаните ја носат конечната одлука. Но, водиме на сите анкети, трендот е позитивен, граѓаните ги препознаваат промените што ги направивме, така што не постои одговор на вашето прашање“,
одговараше Заев.
Тој смета дека партнерството на СДСМ со Беса е добитна комбинација на претстојните избори. Сепак, остава отворена врата и за разговори со лидерот на ДПА, Мендух Тачи, во наредните денови, за евентуално проширување на коалицијата.
„Секоја вечер имаме координација во партијата. Досега не сме имале состанок со Тачи на таа тема. Ако заклучиме дека е добро да имаме состанок, јас сум за тоа да разговараме,“
рече Заев.
Лидерот на СДСМ соопшти и дека советничката група на неговата партија гласала за промена на статутите на двете основни училишта во Чаир, со кои тие добија нови имиња.
Заев е на чело на СДСМ од 2013 година, така што пред изборните циклуси што се одржуваа во последните седум години, во неколку наврати, најавуваше оставка ако ги изгуби изборите. Пред да биде избран за премиер во 2017 година, сегашната опозиција му бараше оставка на Заев затоа што СДСМ освои два мандати помалку од ВМРО-ДПМНЕ на гласањето на 11 декември 2016 година. Притоа, опозицијата се повикуваше на изјава на Заев дека ако СДСМ ги изгуби изборите тој во истиот момент ќе си поднесе оставка и ќе се врати дома. Лидерот на СДСМ најавуваше оставка и ако не успее референдумот за името, кој потоа беше распишан како консултативен, така што неговите резултати не се сметаа за обврзувачки.
Лидерот на ВМРО-ДПМНЕ, Христијан Мицкоски, пак, последните месеци, повикувајќи се на германски искуства, промовира модел на „шпицен кандидат“. Мицкоски предлагаше тој и Заев, како кандидати за премиер, да не бидат кандидат за пратеници на овие избори, а потоа оној што ќе ги изгуби изборите да замине од политиката. Заев, во една пригода одговори дека би прифатил да биде „шпицен кандидат“ ако Мицкоски прифати воведување една изборна единица за парламентарните избори.
На денешната прес-конференција на Заев, на која присуствуваа и група поддржувачи на СДСМ, тој соопшти дека нема да оди на дуел со лидерот на ВМРО-ДПМНЕ, Христијан Мицкоски, на ТВ Алфа. Тој им се обрати на партиските симпатизери во салата со прашање дали да прифати дуел на оваа телевизија и, по негативниот одговор што го доби, соопшти дека останува отворен за соочувања со политичките противници, ама не и на оваа телевизија. Овој негов одговор наиде на аплауз од „публиката“.
Како една од причините зошто нема да оди на дуел во Алфа, Заев посочи на истрага со која е опфатена телевизијата.
„Имаше некои известувања од финансиската полиција за контрола. Ама, и без тоа, го знаеме случајот, кој е тема и во Словенија, за производи од Унгарија што се рекламираат во овдешни медиуми, иако тие производи никогаш не влегле во земјава. За тоа СДСМ држеше и прес-конференции,“
рече Заев.
Од ВМРО-ДПМНЕ реагираат дека одбивањето на Заев да оди на дуел со Мицкоски на ТВ Алфа е резултат на, како шт велат, хибридниот режим во земјава, кој постепен преминувал во авторитарен режим, чиј креатор е Заев.
„Граѓаните се повеќе се свесни за сиот негов криминал во изминатит период, за сите негови погрешни чекори и за цела оваа тортура и притисок што го трпат граѓаните од негова страна и од страна на неговите послушници, но и вие како новинари и нормално вашитеновинарски куќи. Сето ова завршува на 12 април,“
изјави Орце Ѓорѓиевски, портпарол на ВМРО-ДПМНЕ.