Заев и Шекеринска повторно ќе бидат носители на листи
За снимките што излегуваат во јавноста, Заев рече дека кај СДСМ завршиле само околу 30 отсто со материјалите од прислушувањето и дека сите тие биле предадени во СЈО
Заменик-претседателката на СДСМ Радмила Шекеринска ја потврди денеска информацијата дека коалицијата на оваа партија на престојните избори ќе настапи со мешани женско-машки тандеми на чело на листите во шесте изборни единици.
Поврзани вести: Машко-женски двојки на чело на изборните листи на СДСМ
„Во секоја изборна единица ќе настапуваме како тандем, има по еден носител и една носителка на првите две места. Тоа е нов концепт во прилог на нашите заложби за целосна родова еднаквост. Испраќаме порака дека тоа е новата реалност“,
изјави Шекеринска.
Претходно, партискиот претседател Зоран Заев потврди дека тој и Шекеринска ќе бидат носители на листи во две изборни единици. За Заев се знае дека оди повторно во четвртата ИЕ. Тој рече дека, по денешниот марш, СДСМ ќе ги продолжи разговорите за селекција на кандидатите на листите.
Според Заев, на листите на коалицијата на СДСМ ќе има континуитет, но и новини. Повеќемина од досегашните пратеници, како што најави, ќе бидат кандидати и на овие избори. На прашање дали ќе има и други партнери во коалицијата со СДСМ, Заев рече дека се е можно до утрешниот конгрес. Рече и дека е при крај заедничката изборна програма на коалицијата, односно на СДСМ и на Беса.
„Сите можности се отворени до конгресот. Се видоа функционери на СДСМ со претставници на ДПА и пред се изразивме задоволство од досегашната соработка во рамки на владејачкото мнозинство. Останува отворена можноста и за соработка по изборите“,
рече Заев.
„Да не заборавиме кој прислушуваше“
Во однос на објавувањето на новите „бомби“, Заев рече дека сите материјали се предадени во СЈО и дека жали што во овој период излегуваат нови снимки во јавноста.
„Да не заборавиме кој прислушувал во државата. Само дел од тие материјали стигнаа кај нас, 30 отсто од материјалите што се создадени ги добивме, останува веројатноста дека има материјали насекаде. Институциите треба да истражат од каде доаѓаат тие материјали, во кои има и приватни моменти“,
рече Заев.