Централниот одбор на владејачката партија утре ќе ја почне постапката за самокандидирање и номинирање на кандидати за пратеници која треба да заврши околу 12 март
Со родовомешани двојки на чело на кандидатските листи за пратеници во шесте изборни единици планира да настапи СДСМ на изборите на 12 април. Како што објаснуваат партиски извори, таму каде што носителот ќе биде маж следниот кандидат ќе биде жена и обратно. Тие, како што се планира, заеднички ќе ја водат кампањата во одредена изборна единица.
Според партиски извори, се размислува и за варијантата, поделбата на првите места на листите да биде три спрема три, односно тројца носители и три носителки на листите. Сепак, оваа варијанта ќе се анализира допрва, со оглед на спецификите на секоја изборна единица, така што за секој регион ќе се бара најсоодветниот политички профил.
На последните парламентарни избори во 2016 година, само во една изборна единица коалицијата на СДСМ настапи со жена на чело на листата. Тоа беше сегашната министерка за одбрана Радмила Шекеринска, која беше носителка во петтата изборна единица, во која припаѓаат Битола, Охрид, Струга… На листите на ВМРО-ДПМНЕ, пак, сите носители беа мажи, така што главен ривал на Шекеринска ѝ беше пратеникот Антонијо Милошоски.
Шекеринска и втората вицепремиерка во техничката влада сега се споменуваат како дел од женскиот тим на ударните места на листите на СДСМ. Сепак, тоа е засега во доменот на шпекулациите, со оглед на тоа што владејачката партија утре ќе ја почне постапката за утврдување на кандидатите за пратеници на претстојните избори. Се очекува еден од носителите на листа да биде лидерот на СДСМ, Зоран Заев, кој би бил и кандидат за премиер, со оглед на тоа што најави дека бара од граѓаните нов и чист мандат. Тој треба да одлучи дали останува во четвртата ИЕ, во чиј состав е Струмица, или евентуално овој пат ќе си ја проба среќата во првата (скопска) ИЕ.
Утревечер ќе заседава Централниот одбор на СДСМ за да ја утврди процедурата за самокандидирање и за предлагање кандидати за пратеници. Постапката почнува од партиската база, поточно од месните и од општинските организации на СДСМ. Конечниот распоред на листите за пратеници, според најави од партискиот врв, ќе се знае околу 12 март, кога ќе заседава и конгресот на СДСМ.
Во меѓувреме, најавени се консултации на партискиот врв со досегашните коалициски партнери, но и со други партии, за евентуално проширување на коалицијата. Не е исклучено коалицирање и со партија на Албанците, барем во шестата ИЕ. Извесно е дека распоредот на кандидатските листи на коалицијата на СДСМ, од родов аспект, ќе биде 50-50. И тоа, најверојатно, ќе биде наизменично, односно по секој кандидат, ќе има кандидатка за пратеничка.
Според Изборниот законик, кандидатските листи треба да се достават до ДИК 30 дена пред изборите. Но во овој случај роковите за спроведување на повеќето изборните дејствија ќе се скратат по пет дена, освен за кампањата, затоа што станува збор за предвремени избори.