Премиерот рече дека нема да ги коментира „политичките глодари“ кои, како што рече, се ситат на здравствената состојба на градоначалникот на Карпош
Премиерот Христијан Мицкоски ги отфрли како невистинити наводите дека градоначалникот на Општина Карпош, Сотир Лукровски, поднел оставка од функцијата. Не знам од каде е таквиот заклучок, рече Мицкоски одговарајќи на новинарски прашања и додаде дека градоначалникот на Карпош во моментов е на боледување.
„Општината има законски избран заменик-градоначалник кој моментално го заменува градоначалникот додека е на боледување поради одредени здравствени проблеми. На градоначалникот му посакувам брзо опоравување и што поскоро да се врати на својата работна позиција, а дотогаш ќе го заменува заменик-градоначалникот кој согласно закон е именуван од страна на градоначалникот“,
рече Мицкоски во одговор на новинарски прашања по денешната посета на ГОБ „8 Септември“.
Премиерот рече дека дема да ги коментира „политичките глодари“ кои, како што рече, се ситат на здравствената состојба на градоначалникот на Карпош.
Од Општина Карпош минатата недела информираа дека градоначалникот Сотир Лукровски е на боледување, а во тој период негова привремена замена ќе биде членот на Советот на Општина Карпош, Неделчо Крстевски.