Актуелниот лидер на ВМРО-ДПМНЕ вечерва, одговарајќи на новинарски прашања за преписката со неговиот претходник Груевски, рече дека измените на Кривичниот законик биле сценарио што го „подготвуваше оската ДУИ-СДСМ и дел од поранешното раководство на ВМРО-ДПМНЕ“, за да се обезбеди мнозинство кое ќе ги изгласа уставните измени. Но, она што може да го каже, рече тој, е дека ниту сега ниту во иднина, додека е тој претседател на ВМРО-ДПМНЕ, партијата нема да ги поддржи уставните измени под бугарски диктат
Во врска со наводите дека во ВМРО-ДПМНЕ се случува раскол, Мицкоски одговори дека не само што нема нешто такво туку дека партијата никогаш не била пообединета. Според лидерот на опозициската партија, расколот е на друго место
Прашан за коментар на серијата обвинувања од експремиерот и негов претходник на лидерската позиција на ВМРО-ДПМНЕ, а сега бегалец во Будимпешта, Мицкоски со краток одговор и порака: „Па, нека е жив и здрав. Мојата порака до Никола Груевски е дека не би сакал никогаш да им го правам на луѓето тоа што не сакам луѓето мене да ми го прават“
Јас тоа што имав да го кажам поврзано со Никола Груевски го кажав јасно и гласно и нема што повеќе да додадам, изјави вечерва лидерот на ВМРО-ДПМНЕ, во врска со преписката со неговиот претходник. Сепак, во овој контекст, тој посочи дека е наивно да се верува дека измените на Кривичниот законик биле обични и дека зад нив „има многу повеќе“.
Според Мицкоски, тоа е сценарио што го „подготвуваше оската ДУИ-СДСМ и дел од поранешното раководство на ВМРО-ДПМНЕ”, за да се обезбеди мнозинство кое ќе ги изгласа уставните измени.
„Ова беше смислено сценарио, најпрвин да се обезбеди мнозинство со коешто ќе се гласаат уставните измени според бугарскиот диктат. Откако видоа дека тоа нема да се случи, бидејќи јасно беше гласањето, оние 44 пратеници од коалицијата, а тоа се сите пратеници на коалицијата предводена од ВМРО-ДПМНЕ во парламентот, тогаш она во коешто инвестираше власта или оската СДСМ-ДУИ и дел од поранешното раковдство на ВМРО-ДПМНЕ, беше да се спушти потенцијалот на ВМРО-ДПМНЕ. Тие би биле најсреќни тој да биде некаде околу 50 пратеника, бидејќи сега знаат дека сме многу блиску до мнозинство во парламентот и на тој начин при формирањето на идната влада да се уценува ВМРО-ДПМНЕ, да го прифати, би рекол, бугарскиот диктат“,
изјави лидерот на ВМРО-ДПМНЕ, одговарајќи на новинарски прашања во Општина Ѓорче Петров.
Она што може да го каже, рече тој, е дека ниту сега ниту во иднина, додека е тој претседател на ВМРО-ДПМНЕ, партијата нема да ги поддржи уставните измени под бугарски диктат.
„Нема да го прифатам бугарскиот диктат и овие услови коишто ги нуди оваа оска помеѓу СДСМ-ДУИ и дел од поранешното раководство, сега колумнисти на ВМРО-ДПМНЕ. Тоа треба на секого да му е јасно дека такво нешто ниту ќе се случи сега ниту, пак, во иднина“,
рече Мицкоски.
Прашан во врска со наводите дека во ВМРО-ДПМНЕ се случува раскол, Мицкоски одговори дека не само што нема нешто такво туку дека партијата никогаш не била пообединета. Според лидерот на опозициската партија, расколот е на друго место.
„Тие (СДСМ) би посакувале да има раскол. Не само што нема раскол туку партијата никогаш не била пообединета. Но, од друга страна, можете да забележите како, да речеме, кога се гласаше денвниот ред за уставните измени двајца пратеници од коалицијата на СДСМ не гласаа. Истовремено ќе видите дека од ДУИ на дневна основа се појавува некој, па дури имаме и нови политички партии, што значи дека расколот е на друго место. Во ВМРО-ДПМНЕ постои една кохезија како никогаш досега. И на крајот од денот, ако навистина постои раскол, тоа значи дека тие имаат подобра позиција сега, еве нека го распуштат парламентот, да одиме на предвремени парламентарни избори, па нека го искористат тој момент, ако се толку силни. Тоа е единствениот начин да се покаже каде има раскол“,
рече Мицкоски.
Лидерот на ВМРО-ДПМНЕ, откако беше прашан што ќе се случува на состанокот на Централниот комитет на партијата, откри дека вчера заседавал Извршниот комитет и дека станува збор за редовни активности во пресрет на изборите – претседателски и парламентарни, следната година.
„Па, редовен Централен комитет е тоа. Вчера имавме Извршен комитет, претпоставувам дека никој не знае дека сме имале Извршен комитет. Треба да се носат одлуки. За шест месеци од денеска ќе имаме избори, претседателски и парламентарни, значајни. Се докомплетираат структурите на партијата, така што тоа се редовни процеси и на Извршниот и на Централниот комитет“,
изјави Мицкоски.
Прашан за коментар на серијата обвинувања од експремиерот и негов претходник на лидерската позиција на ВМРО-ДПМНЕ, Никола Груевски, а сега бегалец во Будимпешта, Мицкоски со краток одговор и порака:
„Па, нека е жив и здрав. Мојата порака до Никола Груевски е дека не би сакал никогаш да им го правам на луѓето тоа што не сакам луѓето мене да ми го прават“.
Инаку, изминативе два дена во фокусот на јавноста е „војната“ со обвинувања, прашања, одговори и фејсбук-преписки меѓу актуелниот и поранешниот лидер на ВМРО-ДПМНЕ, Христијан Мицкоски и Никола Груевски.
„Фронтот“ го отвори Мицкоски, кој во изјава за германскиот весник Франкфуртер алгемајне цајтунг (ФАЦ) го обвини својот претходник Никола Груевски дека е во тајна комуникација со Владата, со цел да се подели ВМРО-ДПМНЕ за да се протуркаат уставните измени.
На ова, Груевски веднаш преку својот фејсбук-профил објави реакција и побара од Мицкоски да изнесе докази дека тајно комуницирал со Владата за уставните измени. Груевски напиша дека очекува одговорот на Мицкоски да биде јасен, недвосмислен, директен и личен исто како и изјавата, без, како што вели тој, префрлање изјави на претставници на партијата, портпароли, давање брифинзи на портали или други медиуми со кои има блиска соработка.
Преписката продолжи денеска претпалдне со контрареакција на Мицкоски кој на Фејсбук напиша дека му е жал што Груевски се одлучил на чекорот да прави јавна пародија и да служи за дефокус од криминалот на оваа власт. Тој додаде: „Еден ден, кога ќе се видиме очи во очи, ќе ти кажам и детали ако си подготвен да ги чуеш“.
Груевски не чекаше многу време да возврати и во објава на социјалната мрежа напиша дека одговорот на Мицкоски бил, како што и очекувал, без никаков аргумент, без никаков доказ или нешто слично.
Според него, Мицкоски си создава ново алиби за секоја идна намерна или ненамерна грешка и штетна одлука, алиби за идните изборни резултати, кои, како што вели, со овој памет нема да се очекуваните од сите нас.
„Напишал дека сум сакал да создавам раздор и тој не сакал јавно да се препукува, ќе ми кажел во четири очи. А, ме нападна преку најпознатиот германски медиум. Јас знам, а и јавноста, дека со ниту еден збор или потег не сум направил раздор досега. Ако навистина сум планирал такво нешто, зошто не почекаа, да се види тоа, да направам нешто што ќе им биде поткрепа на тезите, а не од наводни озборувања и шпекулации да градат политики“,
напиша денеска Груевски на Фејсбук.
Напротив, вели Груевски, раздорот го направи тој со прогласувањето за нов непријател и жестокиот напад без да се даде најмала причина. Во објавата тој додава дека Мицкоски ја ставил целата партиска машинерија во одбрана на неговите, како што вели, параноични, штетни и бесмислени чекори и политики. Токму тоа е „со сила” создавање раскол, растурање, а не нешто што тој направил.