Претседателот на ВМРО-ДПМНЕ, Христијан Мицкоски, на еврокомесарот за соседство и проширување Оливер Вархеји му рекол дека приоритет на новата влада предводена од ВМРО-ДПМНЕ ќе биде остварување на стратешката цел и сонот на многу генерации – членството во Европската Унија (ЕУ). Тој посочил дека ВМРО-ДПМНЕ има визија и план како државата да ја стави на брзата лента за членство во Унијата и притоа да ги спроведе клучните реформи за остварување на оваа цел.
Ова го соопштија од опозициската партија откако партискиот лидер попладнето се сретна со Вархеји, кој беше во прва официјална посета на земјава.
Мицкоски на средбата со еврокомесарот зборувал и за владата предводена од СДСМ и за, како што велат, криминалот и корупцијата.
„Претседателот на ВМРО-ДПМНЕ потенцираше дека Владата предводена од СДСМ доживеа неуспех на полето на реформите и доближување на државата до европскиот стандард. Тој напомена дека клучен проблем со кој се соочува Република Македонија е криминалот и корупцијата кои се најистакнати во највисоките ешалони од власта и дека до ден денес голем број на корупциски афери немаат правна разрешница, што пак е аргумент за оние кои се противат на проширувањето на Унијата“,
пишува во партиското соопштение.
Тие зборувале и за предвремените избори за кои се согласиле дека мора да бидат фер и демократски поради европерспективата на земјава.
Покрај Мицкоски, од ВМРО-ДПМНЕ на средбата присуствувале и потпретседателот Александар Николоски, меѓународниот секретар Тимчо Муцунски и советникот за меѓународна политика Стефан Андоновски.
На средбата присуствувал и евроамбасадорот Самуел Жбогар.
Вархеји се сретна и со лидерот на СДСМ Зоран Заев, независната пратеничка група на ВМРО-ДПМНЕ, а претходно и и со претседателот Стево Пендаровски и претседателот на Собранието Талат Џафери. Сепак, во фокусот на јавноста беше средбата со премиерот на техничката влада, Оливер Спасовски, после која двајцата одржаа и заедничката прес-конференција.
*Поврзани вести:
Пораките од посетата на еврокомесарот Вархеји во сто збора
Заев до Вархеји: Очекуваме фер методологија од ЕУ (ВИДЕО)
Вархеји: Законот за ЈО е приоритет, клучни се и договорите со Грција и Бугарија (ВИДЕО)
Вархеји: Ни треба одлука за преговори пред Самитот во Загреб
Спасовски: Вархеји најави предлог-методологија за преговори до крајот на месецов
Вархеји за бегството на Груевски: Се работи за национална способност, ЕУ нема што да каже