Дали враќањето на поранешниот премиер Никола Груевски би придонело да се забрзаат реформите и да ја вратат довербата во судството кај граѓаните, е едно од прашањата што попладнево ги доби Унгарецот Оливер Вархеји, новиот еврокомесар за соседска политика и проширување.
„Не мислам дека Комисијата ја има поставено оваа цел, односно дека целта на реформите во судството во Северна Македонија е да се врати поранешниот премиер од земја членка на ЕУ. Се работи за национална способност, ЕУ или Европската комисија немаат што да кажат на ова прашање, па најдобро е да го упатите ова прашање до унгарските власти“, одговори Вархеји.
Тој порача дека во земјава може и мора да има реформа на судството и немешање на политиката, а во насока на тие реформи во неколку наврати го спомена и законот за јавно обвинителство како прв приоритет за земјава.
Вархеји изрази очекување дека тој закон треба да се донесе од актуелниот пратенички состав, што би значело за помалку од еден месец бидејќи Собранието треба да се распушти на 11 февруари во пресрет на предвремените парламентарни избори закажани за 12 април.