Лидерот на ВМРО-ДПМНЕ, Христијан Мицкоски, побара цела Влада да си замине откако Северна Македонија го доби најлошото рангирање досега за Индексот за перцепција на корупцијата за 2020 година.
„Според ‘Транспаренси интернешнл’, по степенот на корупција на историски најлошото 111-то место. Пад од 5 места споредено со минатата година и никогаш полошо во периодот на независна Македонија. Тие не се само мафија, на овие луѓе и мафијата може да им позавиди. Подобри од нас се: Косово, Албанија, Танзанија, Буркина Фасо, Колумбија, Брегот на Слонова Коска, Гамбија, а заедно сме со Панама и Монголија. Пад од цели 45 места за 5 години. После ваков резултат, не е доволна оставка на министерот за правда, или министерот статист за борба против корупција, потребно е целата Влада да си замине, веднаш“,
вели Мицкоски.
Според Индексот за перцепција на корупцијата, Северна Македонија го дели 111-тото место, што е најлошо место од 2001 година, откога земјава првпат беше ставена на ранг-листата. Истото место го делиме со Босна и Херцеговина, Монголија и Панама.
Во однос на рангирањето од 2019 година, бележиме пад од пет места, иако имаме ист број индексни поени, додека БиХ бележи пад од седум места, со што двете земји се најлошо рангирани во регионот на Западен Балкан.