Опозициската ВМРО-ДПМНЕ и денеска продолжи со објавување информации, како што велат, добиени од „свиркачи“ за тоа кој сè добивал македонски пасош, па денеска потпретседателот Владо Мисајловски рече дека на списокот е и еден од главните соработници на италијанската мафија.
„Валид Иса Хмаис, кој важи за главниот перач на пари од трговијата со кокаин на италијанската наркомафија, на 09.1.2019 година во Скопје во регуларна постапка се сликал во управните служби на МВР, а потоа и го подигнал македонскиот пасош со украден идентитет на Македонец од Корча, Вурмо Таќо роден 1965 година. Дали е ова вистина или, како што нарекуваат од СДСМ, само перцепција? Валид од 2017 година е во бегство во повеќе држави во светот, а по добивање на македонскиот пасош на име Таќо Вурмо, двапати во јануари 2019 година го искористил македонскиот пасош и преку аеродром Петровец заминал за Турција“,
рече Мисајловски.
Тој обвини дека Македонија станала Колумбија на Балканот и повторно ја повика власта на одговорност бидејќи, според ВМРО-ДПМНЕ, не може за ваква афера да не знаеле и одговорните лица во МВР и Владата.
„Мафијаши од ваков калибар влегувале во македонската полиција да се сликаат и сакаат сега од владата на Заев и Спасовски да не уверат дека ниту еден полициски службеник не приметил дека станува збор за исклучително опасни луѓе? Зашто МВР нема истрага за тоа дали отворале банкарски сметки? Зашто и по инсистирање на партнерските безбедносни служби Спасовски и МВР не презеле ништо за санкционирање на овој скандал и афера?“,
рече Мисајловски.
Другиот потпретседател на ВМРО-ДПМНЕ, Александар Николоски, вчера на прес-конференција излезе со информации дека пасоши имале шеф на наркоклан од Албанија, Флоријан Мусај, како и платеник на Ковачкиот клан, кој извршил обид за убиство во Украина, Стефан Џукиќ.
Според ВМРО-ДПМНЕ, на Мусај му бил издаден пасош со позајмен идентитет на Наум Фило, а на Џукиќ со идентитет Каче Герги.
Во вторникот прес-конференција одржа и претседателот Христијан Мицкоски, кој, повикувајќи се на добиени документи, рече дека пасоши добиле и водач на озлогласениот Шкаљарски клан за трговија со дрога Јован Вукотиќ и турски државјанин Седат Пекер. Тие добиле лажни идентитет како Ѓорѓи Андонов и Џадин Адемовски.
Еден ден пред да почнат со прес-конференциите, од ВМРО-ДПМНЕ одржаа и брифинг за медиумите навестувајќи ја оваа афера. Наредното утро МВР веќе почна со спроведување на акцијата и ја обвини опозицијата дека сакала да ја саботира. Министерот за внатрешни работи Оливер Спасовски вчера во „Утрински брифинг“ рече дека со партнерите (Интерпол и американската амбасада во Скопје) планирале акцијата да се спроведе за неколку дена, но поради обидот за сузбивање од опозицијата била спроведена во вторникот и, за среќа, според него, успешно.
Спасовски обвини и дека еден од вработените во МВР, кој е уапсен во аферата, имал секојдневни контакти со ВМРО-ДПМНЕ. Денеска, пак, премиерот Зоран Заев во одговор на обвинувањата на опозицијата излезе со изјава дека најголемите фалсификати се случувале во времето на владеење на ВМРО-ДПМНЕ.
*Сите поврзани вести со овој случај:
МВР: Уапсени се десетина полициски службеници за фалсификување лични документи
Чулев тврди дека му оставил на Спасовски комплетирана истрага за фалсификуваните пасоши
Спасовски за аферата со пасошите: Еден од уапсените имал секојдневни контакти со Мицкоски
ВМРО-ДПМНЕ возвраќа: Единствениот со кој Мицкоски контактирал, а можеби е поврзан со пасошите е Заев
„Двојник“: Шест лица завршија во притвор, тројца со мерки на претпазливост
Заев за „Двојник“: Најголемите фалсификати биле во времето на ВМРО-ДПМНЕ