Шест лица осомничени во акцијата „Двојник“, која е поврзана со издавањето пасоши во МВР, завршија во притвор откако таква мерка им определи судија на претходна постапка од Основниот кривичен суд во Скопје. Судот определил мерка притвор и за осомничениот што е во бегство и таа ќе стапи во сила кога ќе биде пронајден.
Основното јавно обвинителство (ОЈО) – Скопје бараше притвор за уште едно лице, но наместо тоа судот му определил мерки на претпазливост.
Со мерки на претпазливост, како забрана за напуштање на живеалиште, јавување во судот и одземање на пасоши, завршија уште двајца осомничени.
Покрај споменатите 10, во случајот е осомничено уште едно лице, но тоа веќе се наоѓа во притвор бидејќи против него се води постапка и за незаконско издавање возачки дозволи.
Сите се осомничени за злоупотреба на службената положба и овластувања. Десетмина од нив се вработени во службите на МВР за издавање пасоши, додека едно лице било посредник. Според информациите што ги објави Обвинителството, осомничените издале 219 пасоши, од кои четири му биле издадени на едно лице.
Осомничените овластени службеници и контролори од управните служби на МВР издавале патни исправи на странци под туѓ, македонски идентитет, а со фотографија од лицето на кое бил издаван пасошот. Идентитетот кој се злоупотребувал бил на лица кои живеат во дијаспората.
За овој случај, опозициската ВМРО-ДПМНЕ прва објави информации во јавноста преку брифинг за медиумите, а потоа имаше и две прес-конференции. МВР, пак, ја обвини партијата дека сакала да ја саботира акцијата.
*Поврзани вести:
МВР: Уапсени се десетина полициски службеници за фалсификување лични документи
Чулев тврди дека му оставил на Спасовски комплетирана истрага за фалсификуваните пасоши
Спасовски за аферата со пасошите: Еден од уапсените имал секојдневни контакти со Мицкоски
ВМРО-ДПМНЕ возвраќа: Единствениот со кој Мицкоски контактирал, а можеби е поврзан со пасошите е Заев