Потпретседателот на ВМРО-ДПМНЕ, Александар Николоски, денеска на прес-конференција објави нови информации со кои располага партијата во врска со аферата за издавање македонски пасоши на осомничени криминалци од странство. Според тоа што го тврди тој, со пасоши се стекнале и водач на наркокартел од Албанија и платеник на Ковачкиот клан кој извршил обид за убиство во Украина.
„МВР во регуларна постапка на 17 јули 2019 му издала македонски пасош со број C1265083 и на шефот на наркоклан од Албанија, Флоријан Мусај, со позајмен идентитет Наум Фило, роден на 22 јануари 1986 година. Мусај станува познат во 2018 година кога против неговиот наркокартел во меѓународна соработка помеѓу полициските служби на Германија, Италија, Холандија и Албанија се откриени 91 кг килограм вреден 20 милиони евра и огромна дилерска структура низ сите овие држави. Според информациите што ги добивме по добивањето на македонски пасош во 2019, Мусај непречено патува низ повеќе европски држави, за во октомври 2019 да пристигне во Јужна Америка“,
рече Николоски.
Потпретседателот на ВМРО-ДПМНЕ рече дека втората индиција што ја имаат е дека пасош поседувал и Стефан Џукиќ, осомничен за обид за убиство на еден од водачите на т.н. Ковачки клан.
„Обидот за убиство се случил во Киев, Украина, а името е Радивоје Звицер. Стефан Џукиќ имал македонски пасош на име Каче Герги. Човек кој медиумите го условуваат како платен убиен на Кавачкиот клан има македонски пасош издаден од МВР“,
рече Николоски.
Тој на денешната прес-конференција ги спомена и Јован Вукотиќ и Седат Пекер, за кои вчера зборуваше Христијан Мицкоски, па праша зошто власта молчела за оваа афера сè додека ВМРО-ДПМНЕ не ја отворила.
„Зошто кога Јован Вукотиќ бил осуден во Белград за поседување македонски пасош со лажен идентитет, МВР не реагирало? Како е можно Седат Пекер, кој според МВР бил протеран, четири дена по протерувањето да се слика во полициска станица во Скопје за лична карта и за пасош? Зошто никој од МВР нема издадено потерница по ниту еден од овие мафијашки босови и зошто паѓаат само ситните риби со цел да се заштита крупните риби? Одговорот е затоа што мафијата е во врвот на власта“,
рече Николоски.
Во вчерашната акција беа уапсени 9 лица, а едно е во бегство. Апсењето следување откако ден претходно ВМРО-ДПМНЕ направи брифинг за медиумите за оваа афера. Министерот Спасовски, пак, денеска рече дека акцијата требало да се спроведе за неколку дена, но поради обидот за саботажа од опозицијата била спроведена вчера, за среќа, според него, успешно.
МВР истрагата ја спроведуваше во соработка со канцеларијата за истраги на американската амбасада во Скопје и со Интерпол.
Спасовски рече дека меѓу уапсените има и лица на раководни позиции и тврди дека целосно се прочистени структурите на оваа криминална група во МВР.
„Внатре во институцијата (МВР) кругот е затворен, сега одиме со најверојатно проширување на истрагата за да ги видиме сите други аспекти. Заедно со обвинителот, идејата беше да се реализира акцијата заеднички и во другите земји, но заради овој обид за саботажа ние го пресековме тој канал и за среќа сè е завршено успешно“,
рече Спасовски денеска за „Утрински брифинг“.