Демири, како што соопшти МВР, вчера бил уапсен во Косово врз основа на издадена меѓународна потерница за сторено кривично дело тероризам во врска со петкратното грозоморно убиство кај Смилковското Езеро
Барањето за екстрадиција на лицето Алил Демири од 2018 година е сѐ уште активно, информираат од Министерството за правда. Демири, како што соопшти МВР, вчера бил уапсен во Косово врз основа на издадена меѓународна потерница за сторено кривично дело тероризам во врска со петкратното грозоморно убиство кај Смилковското Езеро.
Од Министерството за правда велат дека одговорен за натамошната постапка сега е надлежниот суд.
„За лицето Алил Демири побарани се две екстрадиции. Првпат од Република Косово е побарана екстрадиција на 15.3.2013 година. Барањето за екстрадиција беше одбиено со пресуда на Основниот суд во Приштина од октомври 2015 година, потврдено и од Апелацискиот суд во Косово во јануари 2016 година. За Демири има официјален одговор од Косово во февруари 2016 година. Екстрадиција повторно е побарана на 5.9.2018 година. Во постапките сѐ што беше побарано од косовските власти беше доставено. Одговор за екстрадицијата од 2018 година не е добиен“,
соопштуваат од Министерството за правда нагласувајќи дека екстрадицијата од 2018 година е сѐ уште активна.
Во случајот „Монструм“ на доживотен затвор осудени се Алил Демири и браќата Агим и Африм Исмаиловиќ. На 15 години затвор, пак, осуден е Фејзи Азири, а Хаки Азири доби девет години. Еден од петтемина обвинети, Сами Љута, пак, беше ослободен од обвинение.
Ваквата пресуда е правосилна и во повторено судење беше донесена од страна Основниот кривичен суд Скопје, а потоа беше потврдена и од Апелација.
Повторениот судски процес „Монструм“ следуваше откако во 2017 година Врховниот суд го врати случајот на почеток, со што предметот го презеде Специјалното јавно обвинителство (СЈО).
Во петкратното убиство на Велики четврток во 2012 година беа убиени рибарот Борче Стевковски и четворица матуранти: Филип Славковски, Александар Наќевски, Цветанчо Ацковски, Кире Трпковски.