Пратеникот на ВМРО-ДПМНЕ, Антонијо Милошоски, кој е претседател на Комисијата за надворешна политика, за во среда закажа седница на ова собраниско тело чија тема на дневен ред е заземање национален став за бугарските позиции.
Во календарот на Собранието пишува дека седницата е за „утврдување на национален став во врска со позициите на официјална Софија по однос на македонските ЕУ-интеграции, засновани на Објаснувачкиот Меморандум усвоен од страна на Република Бугарија“, а треба да започне во 11 часот на 4 ноември (среда).
Свикувањето на оваа седница, вчера го најави лидерот на ВМРО-ДПМНЕ Христијан Мицкоски додека одговараше на прашања преку вклучување во живо на Фејсбук.
„Ние како партија, преку пратеникот Антонио Милошоски кој е претседател на собраниската комисија за надворешни работи, во текот на следната недела ќе свикаме одржување на седница во рамките на парламентот, на која што ќе може отворено да се разговара за македонските црвени линии, ќе бидат поканети политичари од власта, како и министерот за надворешни работи и Зоран Заев, па ќе можат отворено да зборат за сето тоа што го лажеа македонскиот народ изминативе четири години дека имаат загарантирана европска перспектива“,
истакна Мицкоски.