Игор Мурашов беше притворен од руска патрола во петокот попладнето на патот меѓу електраната во Запорожје и градот Енерходар во Украина. Украинската државна компанија која управува со електраната, Енергоатом соопшти дека тој бил изваден од автомобилот и со врзани очи одведен во непознат правец
Првиот човек на Меѓународната агенција за атомска енергија (МААЕ), Рафаел Гроси, побара од Русија да го ослободи директорот на најголемата нуклеарна централа во земјата, Запорожје.
Тој се надева дека Мушаров брзо и безбедно ќе се врати кај своето семејство и дека ќе продолжи да ги извршува своите функции во електраната.
Игор Мурашов беше притворен од руска патрола во петокот попладнето на патот меѓу електраната во Запорожје и градот Енерходар во Украина.
Украинската државна компанија која управува со електраната, Енергоатом соопшти дека тој бил изваден од автомобилот и со врзани очи одведен во непознат правец.
Нејасно е зошто е приведен Мушаров, а руските власти сѐ уште не соопштуваат никакви информации.
Електраната Запорожје е една од централните точки на руската инвазија на Украина. Москва и Киев досега неколку пати меѓусебно се обвинуваа за гранатирање на централата, ризикувајќи нуклеарна катастрофа. Украинските техничари продолжија да ја управуваат откако руските војници ја зазедоа електраната. Последниот реактор на централата беше затворен во септември поради тековното гранатирање во близина на објектот.
Регионот Запорожје кадешто се наоѓа истоимената централа е меѓу четирите украински региони кои вчера Русија ги анектираше. Претседателот на Русија, Владимир Путин вчера ги потпиша указите со кои областите Запорожје, Херсон, Доњецк и Луганск беа припоени кон Руската Федерација. Овој потег голем дел од меѓународната заедница го оцени како спротивен на меѓународното право и ескалација на конфликтот.