Градоначалниците на општините Карпош и Битола беа повикани откако претходно се споменуваа дека со нив имало средби и разговори бидејќи на локации во нивните општини требало да се градат Европските центри за возрасни лица
Градоначалниците на Карпош и Битола, Стефан Богоев и Наташа Петровска, денеска се појавија во Основниот кривичен суд во Скопје да сведочат во предметот „Меѓународен сојуз“ по предлог на одбраната, но нивното доаѓање беше залудно. Обвинетите и нивните адвокати одбија да ги испрашуваат затоа што Судот одби прво да се изведат докази кои одбраната ги достави на УСБ.
Богоев и Петровска беа повикани откако претходно се споменуваа дека со нив имало средби и разговори бидејќи на локации во нивните општини требало да се градат Европските центри за возрасни лица.
Одбраната не сакаше да ги испитува денеска бидејќи смета дека, според судски речник, нема еднаквост на оружјата и се хендикепирани како одбрана зашто прашањата што сакаат да ги поставуваат се поврзани и со материјалите кои се наоѓаат во пет фолдери на тоа уесбе.
Судијката Софче Гаврилова-Ефремова, пак, рече дека смета оти ова е злоупотреба на правото на одбрана, но најави дека на наредното рочиште, откако и обвинителство ќе го види и ќе се произнесе за уесбето, ќе одлучи дали ќе дозволи да се изведе прво овие докази.
На уесбето, како што рече првообвинетиот Бојан Јовановски-Боки 13, се наоѓаат фотографии, снимки и докуметнација, со кои ќе ја побијат теоријата на обвинителството дека станува збор за фиктивни проекти за старски домови и за измама.
“На тоа уесбе ќе се сретнеме со фотографии кои укажуваат на некакви лажни и недоречени изјави пред овој суд, фотографии и докуметнација, кои утврдуваат на законско работење на невладината организација ‘Меѓународен сојуз’, во оваа фотодокументација ќе најдеме и остварена телефонска комуникација помеѓу мене и останати други лица кои ќе дадат поинаква слика на целиот овој процес”,
рече Јовановски.
Тој појасни дека на уесбето се наоѓаат и изјави од бизнисмените кои се јавуваат како оштетени, кои се дадени во јавноста пред покренувањето на обвинението, а за кои вели дека се спротивни на тоа што се тврди во обвинението. Исто така, има и изјави пред медиумите од премиерот Зоран Заев во кој, според Јовановски, тој дава поддршка на проекти за старечки домови со што одбраната сака да покаже дека не била лажно прикажувана поддршката од власта.
Пред одбраната да побара да се изведат доказите од тоа уесбе, па потоа да се сослушуваат градоначалниците и останатите сведоци, во судницата кратко сведочење имаше директорката на Македонската авторска агенција преку која фирмите „Дрим билдинг“ на Ардијан Амзоски и „Пелистер“ на Силјан Мицевски ги исплатиле парите на Јовановски и на „Меѓународен сојуз“. Таа објаснуваше дека тие како агенција имале обврска да го пресметаат данокот и да ги исплатат парите кои се предмет на договорот, а за двата конкретни договори имале и контрола од УЈП.
„Што се однесува до записникот од контролата, констатирано е дека е точно пресметан и платен данокот“,
рече директорката која потенцираше дека нивната одговорност е само во однос на даночните прописи.
Во предметот, Бојан Јовановски-Боки 13 како првообвинет се товари за делата измама и перење пари. Заменик-претседателката на „Меѓународниот сојуз“, Јасна Мандиќ-Ерцеговиќ и асистенката на Боки, Христина Блажевска, пак, се обвинети за помагање во овие дела, а Фросина Ременски се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Во овој предмет обвинителството тврди дека двајцата бизнисмени Силјан Мицевски и Ардијан Амзоски биле доведени во заблуда и измамени со проекти за изградба на Европски центар за возрасни лица и мобилни сервиси, па преку Македонската авторска агенција исплатиле речиси еден милион евра, Мицевски сума од 719 905, а Амзоски 233 821 евра.