Долгогодишниот сојузник на Путин на Телеграм го напиша својот став
Дмитриј Медведев, поранешен и претседател и премиер на Русија и долгогодишен сојузник на Владимир Путин, утрово реагираше на веста дека Финска и Шведска се се поблиску до поднесување барање за членство во НАТО.
„Во контекст на прокси војната (Русија тврди дека војната во Украина е всушност „војна преку посредници“ што НАТО ја води со Русија) што западните земји ја започнаа со Русија, сакам уште еднаш многу јасно да ги артикулирам работите што веќе се толку очигледно за сите разумни луѓе:
-Трупањето оружје во Украина од страна на земјите на НАТО, обуката на нејзините војници да користат западна опрема, испраќањето платеници и изведувањето вежби од страна на сојузничките земји во близина на нашите граници ја зголемуваат веројатноста за директен и отворен конфликт меѓу НАТО и Русија.
-Таквиот конфликт секогаш има ризик да се претвори во полноправна нуклеарна војна.
-Ова ќе биде катастрофално сценарио за сите“,
напиша Медведев.
На крајот тој порачува дека Западот „не треба да се лаже себеси и другите“ и „да не се задушува со сопствената плунка во пароксизмите на русофобијата!“
Денеска Финска го направи првиот официјален чекор кон влез во НАТО. Финскиот претседател Саули Ниинисто и премиерката Сана Марин денеска објавија дека „Финска мора да поднесе барање за членство без одлагање“.
„Членството во НАТО ќе ја зајакне безбедноста на Финска. Како членка би ја зајакнале целата алијанса. Финска треба итно да аплицира за членство во НАТО. Се надеваме дека чекорите кои се уште се потребни за да се донесе оваа одлука ќе бидат преземени во наредните денови“,
се вели во заедничкото соопштение.