Макрон призна дека мнозинството Французи се против пензиската реформа, но додаде дека помеѓу анкетите на јавното мислење и општиот интерес на земјата, тој го избира општиот интерес
И покрај растечкото незадоволство во Франција поради пензиската реформа, претседателот Емануел Макрон вели дека нацрт-законот за зголемување на старосната граница за пензионирање од 62 на 64 години мора да биде спроведен до крајот на годината.
Денешното интервју кое Макрон го даде за националната телевизија во Франција е негово прво обраќање откако француската влада ја искористи специјалната уставна моќ за да го усвои законот без гласање во парламентот, но и откако „преживеа“ две гласања за недоверба во Долниот дом на парламентот.
Макрон призна дека мнозинството Французи се против реформата, но додаде:
„Помеѓу анкетите на јавното мислење и општиот интерес на земјата, јас го избирам општиот интерес“,
рече францускиот претседател.
По неговото национално телевизиско интервју, некои од критичарите сугерираа дека „си игра со оган“ среде штрајкови и секојдневни демонстрации, а шефот на Социјалистичката партија, Оливие Фор, рече дека Маркон се однесува како некој што „истура бензин на запален оган“.
Следниот голем протест низ целата земја е закажан за в четврток.