Францускиот претседател, на маргините на Самитот на седумте медитерански земји од Европската Унија, ќе се сретне со грчкиот премиер
Солидарност од Франција за Грција по пожарот во бегалскиот камп Мориа на Лезбос, изрази доцна синоќа францускиот претседател Емануел Макрон преку Фејсбук, неколку часа пред средбата со грчкиот премиер Кирјакос Мицотакис на Корзика.
„Пожарот во бегалски камп на Лезбос е уште една дополнителна драма за бегалците кои веќе се наоѓаат во лоша ситуација. Франција уште еднаш ќе изрази солидарност за Грција“,
напиша Макрон на грчки јазик на Фејсбук и додаде дека денеска ќе се види со Мицотакис.
Францускиот претседател на маргините на Самитот на седумте медитерански земји од Европската Унија, кој денеска се одржува на Корзика, ќе се сретне со грчкиот премиер, јави МИА од Атина.
Портпаролот на грчката Влада Стелиос Пецас на редовниот брифинг со новинарите во понеделникот рече дека Мицотакис и Макрон ќе дискутираат „за случувањата во Источниот Медитеран, за турската провокација, но и прашањата за билатералната соработка во областа на одбраната“.