Најголемата домашна компанија за продажба на нафтени деривати „Макпетрол“ АД ја поддржа владината одлука за покачување на акцизата на нафтените деривати, како дел од пакетот антикризни мерки за стабилизирање на Буџетот.
„Во овие моменти потребно е секоја индустрија да излезе со поддршка за спасување на економијата. Сметаме дека секој треба да покаже солидарност и да преземе дел од товарот и помогне за справување со кризата што не засега сите“,
соопштија од „Макпетрол“.
Но во исто време, велат од компанијата, владата должи објаснување затоа што не биле изедначени акцизата на екстра лесното гориво и дизелот. Со остар речник, од „Макпетрол“ прашуваат – на кого во државата му одговара криминалот со „црвената нафта“?
„Додека државните институции имаат проценки дека со изигрување на сегашната правна рамка на пазарот како гориво за транспорт завршуваат околу 50 милиони литри екстра лесно гориво за греење, државата не презема мерки за сузбивање на сивата економија. Статистиката покажува дека годишно се увезуваат 55 милиони екстра лесно гориво, а реалната потрошувачка е 5 милиони, вишок остануваат 50 милиони од ова гориво. Државата губи по повеќе од 11 денари од литар екстра лесно гориво што се користи за транспорт. Зошто се уште масовно се троши екстра лесно гориво кога е завршена грејната сезона?“,
велат од „Макпетрол“.
Според „Макпетрол“, злоупотребите со екстра лесното гориво прават штета не само на буџетот и на конкуренцијата, туку и на животната средина, бидејќи тоа гориво содржело и до 100 пати повеќе сулфур од обичниот дизел.
„Голем дел од земјите во регионот го имаат регулирано пазарот со екстра лесното, додека во Европската Унија, голем дел од земјите одамна го исфрлија од употреба екстра лесното гориво. Дадените препораки на Република Северна Македонија од Светска банка за транзиција кон почисти горива и забрана на горива во висока емисија на сулфур (екстра лесно гориво) не се почитуваат“
реагираат од „Макпетрол“.
„Макпетрол“ АД бара да ја преиспита својата позиција за екстра лесното гориво, а во спротивно се заканува дека ќе ги извести Светската банка за транзиција и Европската енергетска заедница.
*поврзана вест Акцизата на нафтата се зголемува за три денари