Во реакцијата на македонското Министерство се вели дека одлуката на Комисијата за употреба на имиња на личности и на министерот за правда, со која на културниот центар во Битола му се забранува употребата на името на Иван Михајлов во својот назив, не е насочена против уставното право на здружување
Вчерашните одлуки на Министерството за правда и на Централниот регистар во врска со именувањето на здруженијата „Иван Михајлов“ во Битола и „Цар Борис Трети“ во Охрид, бугарското Министерство за надворешни работи ги окарактеризира како обиди за ограничување на правото на здружување на Бугарите во земјава
Откако бугарското Министерство за надворешни работи (МНР) денеска излезе со став оти Северна Македонија врши обид за за ограничување на правото на здружување на Бугарите, алудирајќи на одбивањето на името на културниот центар „Иван Михајлов“, со реакција се јави и македонското МНР.
Во реакцијата на македонското Министерство се вели дека одлуката на Комисијата за употреба на имиња на личности и на министерот за правда, со која на културниот центар во Битола му се забранува употребата на името на Иван Михајлов во својот назив, не е насочена против уставното право на здружување.
Ваквата одлука, потенцираат оттаму, е во согласност со Законот за здруженија и фондации кој предвидува забрана за граѓански здруженија, фондации и политички партии да користат имиња на контроверзни личности, кои создаваат непријатност меѓу граѓаните на земјата.
„Северна Македонија има високо ниво на заштита и негување на правата и националните, јазични и културни особености на секоја заедница и тоа право не е ограничено, ниту би можело да се ограничи. Комисијата за употреба на имиња носи мериторни одлуки согласно законските прописи и интенцијата да се зачува суштината на мултиетничкото општество“,
се наведува во соопштението на Министерството за надворешни работи.
Во написот се потенцира дека уредувањето и општествените околности во земјава се признаени на меѓународно ниво, како пример за тоа како треба да се негуваат различностите и да се штитат малцинските права.
„Работата на Заедничката мултидисциплинарна експертска комисија, од друга страна, ја има целосната поддршка на институциите на Република Северна Македонија, но нејзината работа не е поврзана со Законот за здруженија и фондации, односно условите под кои се формираат и делуваат здруженијата на граѓани“,
додаваат од МНР во реакцијата.
Вчерашните одлуки на Министерството за правда и на Централниот регистар во врска со именувањето на здруженијата „Иван Михајлов“ во Битола и „Цар Борис Трети“ во Охрид, бугарското Министерство за надворешни работи ги окарактеризира како обиди за ограничување на правото на здружување на Бугарите во земјава.
Оттаму посочија дека одлуките што ги носат властите во С Македонија се директно поврзани со степенот на демократизација во земјата и дека тие се во спротивност со заложбите на Скопје во областа на човековите права и обврската да обезбеди еднакви права и слободи за сите граѓани, вклучително и за оние кои се дефинираат како Бугари.