Првиот изборен круг во Косово се одржа паралелно со првиот круг од локалните избори во С Македонија, кој, практично, ја најави доминацијата на досегашната опозиција низ 120 општини во земјава и во Градот Скопје. Во Косово, пак, Самоопределување не освои ниту една општина на 17 октомври, а вчера победи во само четири општини, но изгуби во Приштина
Во февруари годинава партијата Самоопределување извојува победа на предвремените парламентарни избори во Косово, освојувајќи над 50 проценти од гласовите, за еден месец подоцна партискиот лидер Албин Курти да се врати на премиерската функција.
Точно девет месеци по победата на парламентарните избори, Самоопределување доживеа неуспех и во вториот круг од локалните избори во земјата, освојувајќи само четири општини или само една повеќе од претходните локални избори во Косово, во 2017 година. Самоопределување победи во Гњилане, Каменица, Подуево и Штимље, а во вториот круг од локалните избори во Косово кандидатите на партијата беа поразени во осум општини.
Како што јавуваат косовските медиуми, партијата на Курти загубила во Приштина, Призрен, Ѓаковица, Качаник, Раховец, Вити, Косово Поље и Обилиќ.
Самоопределување во вториот круг имаше кандидати во 12 општини, од 38 општини во Косово.
Во првиот круг на изборите Самоопределување не победи во ниту една општина, од 17 во кои гласањето за градоначалник заврши на 17 октомври.
Како што пренесува „Косово онлајн“, Демократскиот сојуз на Косово, предводен од Љумир Абдиџику, победи во седум општини, додека во 2017 година водеше во осум.
Алијансата за иднината на Косово, која имаше седум општини во 2017 година, сега е прва во пет општини.
Движењето Самоопределување, кое беше прво на централните избори со 50,28 отсто, на локалните избори доби најмал број општини бидејќи ќе води само четири.
Социјалдемократската иницијатива победи само во Малишево на локалните избори во 2021 година, како и на оние во 2017 година.
КДТП е победник и во Мамуша на овие избори, како и на оние одржани во 2017 година.
За разлика од претходните локални избори, каде што во две општини победија двајца независни кандидати, на овие избори има само еден – Џафер Гаши од Граѓанската иницијатива за Обилиќ.
Новата Косовска алијанса не доби ниту една општина, додека на последните избори ја освои Јужна Митровица со Агим Бахтири, кој потоа се приклучи на движењето Самоопределување.
Првиот изборен круг во Косово се одржа паралелно со првиот круг од локалните избори во С Македонија, кој, практично, ја најави доминацијата на досегашната опозиција низ 80 општини во земјава и во градот Скопје. СДСМ, кој во јуни минатата година победи на парламентарните избори во земјава, на 31 октомври, кога се одржа вториот круг од локалните избори, дефинитивно ја изгуби битката за Скопје, како и во повеќето општини во главниот град, со исклучок на Центар.