Скромните почетоци пред 100 години денес се претворени во солидна база за успеси на македонското воздухопловство, рече премиерот Димитар Ковачевски на денешниот аеромитинг што се одржа на спортскиот аеродром Стенковец кај Скопје по повод јубилејот – 100 години македонска авијација
Првото летало на македонската авијација „Илинденка“ е изложено денеска на спортскиот аеродром Стенковец, каде се одржа свеченост со голем аеромитинг по повод 100 години македонска авијација.
Илинденка е произведена во фабриката „20 Мај“ во Скопје. Првиот лет со едрилицата е изведен во 1955 година, а ќе остане запаметена по своето учество на светското едриличарско првенство во Полска во 1958 година, како дел од тогашната репрезентација на СФР Југославија.
„Оттогаш до денес овој воздухоплов беше во Воено-техничкиот музеј во Белград и благодарение на одличните односи што ги имаме со претседателот на Србија, со министерот за надворешни работи на Србија и благодарение на нивна помош и на директорот на ВТМ во Белград, овој воздухплов денес е во Скопје каде му е и местото“,
рече премиерот Димитар Ковачевски.
„Илинденка“, како што посочи Ковачевски, отворила пат за создавање серија вакви едрилици кои биле испратени ширум поранешна Југославија каде добивале само пофалби и ги вбројувале меѓу најдобрите во светот. Ковачевски истакна дека на 100-годишнината од формирањето на македонската авијација со гордост можеме да кажеме дека ние сме НАТО, а нашата следна дестинација е ЕУ.
„Нашиот правец е создавање просперитетна економски силна и европска РСМ. Тоа е единствениот и вистински правец кој ќе обезбеди заслужено етаблирање на нашата земја, која денес е препознаена како кредибилен партнер во трансатлантската заедница, партнер во креирањето и одржувањето на регионалниот и светскиот мир, меѓународно признаена како земја со цврст, зацврстен и потврден македонски идентитет, јазик и култура. Онака како што денес заедно ја бележиме нашата историја, така и заедно да бележиме историја и на европската маса,
рече Ковачевски.
Посочувајќи дека во 1923 година е формиран првиот аероклуб во нашата држава, аероклубот „Скопје“, истакна дека нашата авијација поминала низ многу предизвици.
„Но, со упорноста и големата верба успеа да ги надмине предизвиците и да добие епитети на почит и уважување. Велам многу предизвици бидејќи скромните почетоци пред 100 години, денес се претворени во солидна база за успеси на македонското воздухопловство, не само на нашата држава, туку и надвор од неа, а тоа го докажуваат и многуте заеднички активности кои нашите пилоти, нашите авијатичари, ги реализирале и ги реализираат како преку учество во акции и зачувување на човечки животи во државата, така и преку заеднички и регионални и глобални акции на полето на безбедноста“,
наведе Ковачевски.
На настанот меѓу гостите беа и министерот за надворешни работи на Република Србија, Ивица Дачиќ, како и амбасадорот на Италија во Република Северна Македонија, Андреа Силвестри.
Програмата опфати учество на над 30 различни воздухоплови од земјава и странство како и падобранци од нашата земја и од пријатели на клубот од целиот регион.