Во рамки на мастерпланот на СДСМ, како што изјави партискиот лидер, покрај одредбата за продолжување на европскиот пат, ќе бидат опфатени и специјални закони за соработка со Европското обвинителство и можност за ревизија на случаите кои, како што рече, создаваат немир во општеството. Како пример го посочи пожарот во модуларната болница, но и сите коруптивни случаи, зад кои, како што рече, стои врвот на ВМРО-ДПМНЕ
Специјален закон за ветинг за сите актуелни и поранешни функционери, враќање на прогресивниот данок и посебно оданочување на екстрапрофитите на најголемите компании се дел од мастерпланот на СДСМ, изјави вечерва лидерот на партијата Венко Филипче во интервјуто за емисијата „Директно“ на Телма.
Со предложениот закон за ветинг, Филипче вели дека би биле опфатени сите функционери, вклучително и тој самиот, како и поранешни и актуелни функционери од СДСМ и ВМРО-ДПМНЕ. Во процесот, како што посочи, би биле вклучени и странски експерти, а би се проверувало и потеклото на имотот.
„Специјалниот закон за ветинг да ги опфати сите функционери, почнувајќи од мене и сите други од времето на СДСМ – Зоран Заев, Радмила Шекеринска, Петре Шилегов, но и сите сегашни функционери на ВМРО на чело со премиерот Христијан Мицкоски. Со странски експерти да се провери потеклото на имот, вклучително и проверки и потекло на имот на најголемите компании кои во изминатите повеќе од 10 години работа, создаваа и остваруваа екстра профити. Имаме мултимилионери на сметка на државата“,
рече Филипче.
Во рамки на мастерпланот на СДСМ, како што изјави партискиот лидер, покрај одредбата за продолжување на европскиот пат, ќе бидат опфатени и специјални закони за соработка со Европското обвинителство и можност за ревизија на случаите кои, како што рече, создаваат немир во општеството.
„Јас не бегам од одговорност. Модуларната болница во Тетово, како и случајот со мазутот нека ги ревидираат европските обвинители, нека се види што е позадината. Ама нека се истражат и сите случаи кои ги објавуваме и за кои се сомневаме дека има корупција зад која стои врвот на ВМРО-ДПМНЕ“,
додава лидерот на СДСМ.
Според Филипче, мастерпланотна СДСМ е насочен кон враќање на довербата на граѓаните преку правда, борба против корупцијата и продолжување на европскиот пат.