„Бидејќи ние имаме иднина којашто треба да нè обедини. И од таа гледна точка, кога зборуваме за решението од 2022 година ние треба да функционираме во еден систем којшто значи меѓусебна доверба. Нашето гледање е дека имаме различно толкување на она што се очекува од нашата земја во однос на одлуката од 2022 година“, изјави шефот на македонската диппломатија Тимчо Муцунски пред почетокот на Самитот на Процесот за соработка во Југоисточна Европа (ПСЈИЕ), што се одржува во Софија
Нашата цел не е само да стигнеме до фаза на отворање на пристапните преговори, туку и успешно да ги затвориме, изјави шефот на македонската диппломатија Тимчо Муцунски пред почетокот на Самитот на Процесот за соработка во Југоисточна Европа (ПСЈИЕ), што се одржува во Софија, Бугарија.
За да се постигне тоа, за Македонија, како што кажа, е важно да знаеме дека нема да има дополнителни барања за земјата поврзани со историјата, идентитетот и јазикот, како и други билатерални прашања кои би се појавиле по отпочнувањето на преговорите – прашања поврзани со историски комисии кои, како што посочи, не се европски темелни прашања.
„Затоа велам – добро е да разговараме и да расчистиме што се очекувањата од двете страни бидејќи, сепак, има еден силен билатерален елемент во сето ова. Тука се најголемите недоразбирања“,
рече Муцунски.
Тој посочи дека како човек е цврсто убеден оти силните идентитети немаат потреба да се градат преку напади на другите идентитети. Надоврзувајќи се на својот став, тој за медиумите, од кои голем дел од земјата домаќин на Самитот, рече дека во Европа од 21. век треба да имаме капацитет да ги славиме нашите различности, да се почитуваме и да не се врзуваме со прашања поврзани со историја, идентитет, јазик, туку да гледаме кон заедничката иднина која нè обединува.
„Кога зборуваме за билатералниот аспект помеѓу двете држави, тоа што јас секогаш го кажувам е дека заемен интерес на двете држави е ние да се движиме напред на патот кон полноправно членство во Европската Унија“,
рече министерот за надворешни работи и надворешна трговија.
И двете држави, како што кажа министерот, говорејќи во истиот контекст, ќе добијат многу од тој процес, посочувајќи дека тој сака да ја убеди другата страна оти ние (Македонија) имаме најпозитивни намери за соработка во делот на одбраната, безбедноста, економијата, образованието.
„Лично, како универзитетски професор сум учествувал на безброј настани, меѓународни конференции, токму тука во Софија“,
додаде тој.
Сите овие случувања од последните години, мислејќи притоа на спорот меѓу двете држави што го блокира евроинтегративниот процес на Македонија, како што кажа Муцунски пред новинарите, вештачки ги двојат народите на двете држави, но она што е значајно, додаде тој, е да имаме поглед кон иднината и да не се врзуваме за прашања од минатото и прашања поврзани со идентитетот, историјата и јазикот.
„Бидејќи ние имаме иднина којашто треба да нè обедини. И од таа гледна точка, кога зборуваме за решението од 2022 година, ние треба да функционираме во еден систем којшто значи меѓусебна доверба. Нашето гледање е дека имаме различно толкување на она што се очекува од нашата земја во однос на одлуката од 2022 година“,
рече шефот на македонската дипломатија.
Министерот за надворешни работи и надворешна трговија рече и дека според него Северна Македонија подготвила, како дел од барањата, одличен акциски план за малцинствата, не за бугарското, туку за сите малцинства во земјата, а во соработка со експерти делегирани од Советот на Европа.
„Но, она што е важно, за да можеме да продолжиме напред, е да работиме во следниот период на градење меѓусебна доверба“,
посочи Муцунски.
Според него, со дијалог и меѓусебно разбирање, нема предизвик што не може да се реши, ако има волја и ако сите страни се посветени на европската идеја.
Министерот за надворешни работи и надворешна трговија Тимчо Муцунски денеска во Софија учествува на Состанокот на министрите за надворешни работи на Процесот за соработка на Југоисточна Европа (ПСЈИЕ), кој се одржува во рамките на бугарското претседавање со оваа регионална иницијатива.
Состанокот е посветен на одбележувањето на 30-годишнината од формирањето на ПСЈИЕ и се одржува под мотото „Заеднички компас за стабилен, безбеден и одржлив регион – 30 години регионална сопственост и европска аспирација“.
Во фокусот на разговорите се европската перспектива на регионот, зајакнувањето на регионалната соработка, безбедноста и отпорноста, како и економскиот развој и конкурентноста во услови на сложени геополитички предизвици.
На Самитот на шефови на држави и влади на земјите од Процесот за соработка во Југоисточна Европа (ПСЈИЕ) учествува претседателката Гордана Сиљановска-Давкова која ќе се обрати на пленарната сесија посветена на темата „Компас кон стабилност, безбедност и одржливост“.
На маргините на Самитот, таа ќе оствари билатерални средби со в.д. претседателката на Бугарија, Илијана Јотова, и со в.д. претседателката на Косово, Албулена Хаџиу.