Министерот за здравство Венко Филипче на денешната прес-конференција рече дека нема потреба за посебни истражувања за овие случаи во контекст на ковид-19
Мајката и синот, кои беа пронајдени починати во својот дом во Велес, починале три до пет недели пред да бидат пронајдени, покажале резултатите од увидот на Институтот за судска медицина.
Тоа според министерот за здравство Венко Филипче значи дека тие починале во март, а не во јануари како што беа првичните индиции, поради што според Филипче нема потреба за посебни истражувања во контекст на ковид-19.
Одговарајќи на новинарско прашање дали жената ќе се води како случај на починат од коронавирус, Филипче рече дека негово лично мислење е дека треба, но остави конечна одлука да се донесе во консултација со епидемиолозите.
На прашањето дали е можно тој вирус да го пренел полицаецот кој бил на увид, или обратно, бидејќи и тој е дијагностициран со ковид-19, Филипче рече дека полицаецот носел целосна заштитна опрема.
„Починат човек не може да го пренесе вирусот и затоа брисот е земен длабоко од трахијалното стебло, заради лежењето и земјината тежа. Јас би рекол дека нема врска едно со друго, полицаецот носел соодветна опрема и тоа го потврдивме од неколку места. За нас овој случај беше интересен од друг аспект, доколку времето на смртта беше како што претходно имаше индиции, со што ќе се отвореше прашањето за присуството на овој вирус кај нас. Сите други аспекти не се од наш интерес туку на Судска медицина“,
одговори Филипче.
Понатаму, на Институтот ќе се спроведуваат натамошни испитувања кои ќе ја утврдат причината за смртта.
Жената според податоците имала 89 години, а синот 53.
На 10 април, Филипче на прес- конференција соопшти дека кај нив било откриено присуство на ковид-19 во дишното стебло, со што се покрена дилемата дали оваа болест била присутна во земјата уште пред 26 февруари, кога беше дијагностициран првиот случај кај нас.