Прво ќе ја натерам Британија повторно да работи. Имам храбар план за економски раст преку даночни намалувања и реформи, порача новата британска премиерка која функцијата ја презема во ситуација кога државата се соочува со двоцифрена инфлација
Лиз Трас, во првото обраќање како премиерка на Велика Британија вети дека ја извади земјата од економската бура и пред британската јавност претстави три приоритети на кои ќе се фокусира во мандатот: економијата, енергетската криза и јавното здравство.
Таа ја презема премиерската функција од Борис Џонсон кога Велика Британија, како и светот, ја доживува најголемата ценовна криза во последните децении, инфлацијата е над 10 проценти, а цените на енергенсите растат и за бизнисите и за домаќинствата.
„Уверена сум дека заедно можеме да ја истераме бурата. Можеме да ја обновиме нашата економија и можеме да станеме модерна брилијантна Британија каква што знам дека можеме да бидеме“,
изјави 47 годишната премиерка во првото обраќање од пред Даунинг стрит 10.
Трас вети раст на економијата и давање приоритет на производите произведени во Обединетото Кралство, но призна дека земјата се соочува со предизвици произлезени од пандемијата на Ковид и војната во Украина.
„Прво ќе ја натерам Британија повторно да работи. Имам храбар план за економски раст преку даночни намалувања и реформи. Ќе ги намалам даноците за да ја наградам напорната работа и да го поттикнам растот и инвестициите предводени од бизнисот. Ќе испорачам реформи за мојата мисија да постигнам Обединетото Кралство повторно да работи, да гради и повторно да расте“,
рече Трас.
Таа увери дека ќе ги вложи сите можни напори за да се осигури дека луѓето не мора да плаќаат сметки за енергија што не можат да си ги дозволат, а и вети дека ќе изгради болници, патишта, училишта и широкопојасен интернет пристап.
Уште првиот ден таа веќе ги назначи своите блиски соработници на високи позиции во нејзиниот кабинет: Кваси Квартенг за министер за финансии, Тереза Кофи за вицепремиерка и министерка за здравство и Џејмс Клевери за министер за надворешни работи.
Трас официјално од денеска ја презеде премиерската функција откако кралицата Елизабета Втора ја назначи на нетрадционална церемонија во шкотскиот дворец Балморал. Наместо назначувањето на новиот британски премиер да се изведе во Бакингемската палата во Лондон, кралицата првпат во своето 70-годишно владеење овој чин го направи во својата летна резиденција, замокот Балморал, каде што се наоѓа на годишен одмор.