По синоќешната неизвесност дали ќе има мнозинство, затоа што недостигаше само уште еден глас, пратеничката од ДОМ, според партиски извори, во последен момент одлучила да гласа „за“
Пратеничката Лилјана Поповска од ДОМ го обезбедила последниот глас што недостигаше за донесување на Законот за јавно обвинителство, кој денеска беше усвоен со точно 80 гласа. По синоќешната неизвесност дали ќе има мнозинство за законот, затоа што недостигаше само уште еден глас, Поповска, според партиски извори, во последен момент одлучила да гласа „за“.
Случајно или не, при првото изјаснување за Законот за ЈО, кое беше поништено, Поповска беше меѓу шестемина пратеници од мнозинството чиј глас не беше регистриран. Не се знае дали Поповска потоа гласала „за“ и за Законот за Совет на јавни обвинители, за кој немаше потреба од двотретинско мнозинство. Овој Закон беше донесен со 74 гласа.
Листингот од гласањето за Законот за Советот на обвинители се уште не е објавен на собраниската интернет-страница, така што не се знае кои се шестемина пратеници кои во овој случај се воздржале од гласање, а гласале за Законот за ЈО. Гласањето за Законот за СЈО денеска, исто така, предизвика реакции во врска со тоа дали требало или не да има изјаснување и според „Бадентер“.
Пред неколку дена се проширија гласини дека двете пратенички на ДОМ – Поповска и Маја Морачанин, која е сега претседателка на партијата, се колебаат околу тоа дали да гласаат за Законот за ЈО. Но Морачанин, во изјава за “360 степени” во петокот, најави дека ќе гласа „за“, а Поповска не одговори на телефонските повици.
Поповска, некогашна функционерка на ЛДП, која во 2006 година ја формираше ДОМ, во овој собраниски состав влезе од листата на коалицијата предводена од СДСМ во првата изборна единица, откако дел од кандидатите се повлекоа од Собранието и преземаа функции во извршната власт. Таа денеска беше единствена што се обрати од собраниската говорница пред гласањето за Законот за ЈО. Рече дека по 18 години континуиран стаж во Собранието веќе нема да се кандидира за пратеничка. Посочи и дека очекувала поконструктивна расправа за Законот за ЈО.
Поповска рече дека предност ќе им даде на аргументите дека донесувањето на законот за ЈО може да им ги избие аргументите не некои земји членки на ЕУ да не се согласат со почеток на преговори за членство со земјава. Иако, рече, таа не е сигурна дека тоа ќе се случи во март.
Од 2008 до 2016 година Поповска беше пратеничка од коалаицијата предводена од ВМРО-ДПМНЕ. Во последните три години, пак, таа во повеќе наврати беше спомнувана како критички настроена кон одредени проекти на владејачкото мнозинство. Сепак, гласаше за уставните измени што произлегоа од Преспанскиот договор, но не и за Законот за јазиците.