Елизабета Канчевска Милевска е единствена од независните пратеници која не даде поддршка за ова законско решение, за разлика од гласањето „за“ уставните амандмани
Лидерот на ДУИ Али Ахмети е еден од пратениците чиј глас не бил регистриран при првичното изјаснување за Законот за ЈО, кога скорот беше 74 гласа „за“ и 32 „против“, така што недостигаа шест гласа за негово донесување. Меѓу пратениците од мнозинството за кои првично е регистрирано дека „не гласале“ се и Џевад Адеми од ДУИ, како и пратениците од коалицијата на СДСМ Лилјана Поповска, Самка Ибраимовски и Амди Бајрам. Сите тие гласале „за“ при повтореното изјаснување.
И при првото и при второто гласање, не е регистриран гласот на поранешната министерка за култура Елизабета Канчевска Милевска. Таа е единствената од пратениците кои беа исклучени од ВМРО-ДПМНЕ затоа што гласаа за уставните измени, која не го притисна „зеленото копче“. Пратеникот Панчо Минов, за кого имаше информации дека се двоуми дали да гласа „за“, сепак, на крајот даде „виза“ за Законот за ЈО.
Поништувањето на првото гласање предизвика сомневања во јавноста за испраќање политички пораки и за политички маневри од дел од политичките субјекти. Сепак, од собранието велат дека „потфрлил“ системот и дека не регистрирал дел од гласовите.
„Немаше никаков проблем. Системот знае да затаи, тоа се случувало и другпат,“
велат од парламентарното мнозинство.
За разлика од првото гласањ, при „валидното“ гласање само шестмина од ВМРО-ДПМНЕ се изјаснија „против“, додека другите или не гласале или не биле присутни. „Против“ се изјасниле само пратениците Зоран Илиоски, Дафина Стојановска, Лилјана Кузмановска, како и Ане Лашковска, Магдалена Манаскова и Слаѓана Митовска.
