Видео-снимката од гласањето за измените во Законот за Советот на јавни обвинители потврдува дека спикерот Џафери првично вели дека законот се носи со двојно мнозинство, а потоа констатира дека е усвоен без второ гласање
Од кабинетот на Џафери се повикуваат на член 11 став 3 од Законот за Комитетот за односи меѓу заедниците, каде се наведени законите што се гласаат со Бадентер, а меѓу нив го нема Законот за Советот на јавни обвинители
Измените и дополнувањата на Законот за Советот на јавни обвинители се усвоени во согласност со Деловникот и Законот за Комитетот за односи меѓу заедниците, велат од кабинетот на претседателот на Собранието, Талат Џафери. Реакцијата доаѓа по прес-конференцијата на пратеникот на ВМРО-ДПМНЕ, Илија Димовски, на која посочи дека спикерот Џафери првично рекол дека за носење на законот е неопходно апсолутно и Бадентерово мнозинство, а потоа не побарал изјаснување на пратениците припадници на немнозинските заедници.
*поврзана вест ВМРО-ДПМНЕ: Немаше двојно мнозинство за законот за Советот на јавни обвинители
На видео-снимката од тој дел од 135. седница навистина се слуша како претседателот на парламентот, пред гласањето, наведува дека е потребно и Бадентерово мнозинство, а потоа констатира дека законот е донесен без двојно гласање.
Објаснувањето е дека на интервенција на генералниот секретар на Собранието, Цветанка Иванова, која седи во негова близина, Џафери се коригирал и не побарал второ гласање.
Од кабинетот на Талат Џафери се повикуваат на член 11, став 3 од Законот за Комитетот за односи меѓу заедниците, каде се наведени законите што се гласаат со Бадентер, а меѓу нив го нема Законот за Советот на јавни обвинители.
Со исто објаснување на „Фејсбук“ се јави и координаторот на пратеничката група на СДСМ, Јован Митрески.
„На колегата кој е еден од поголемите познавачи на законите и процедурата не му забележувам. Знам која му е целта… За граѓаните да немаат дилема, во прилог ја ставам листата на закони кои се носат со двојно мнозинство според Законот за Комитетот за односи меѓу заедниците, а таму не е Законот за Совет на јавни обвинители“,
напиша Митрески на „Фејсбук“.
Митрески во постот уште додава дека „во Собранието има еден уште поголем познавач на процедурите и законите кој долго време бил претседател на институцијата“ и затоа објавува „еден стенограм кога водел седница кога се менувал Законот за Совет на јавни обвинители каде се гледа дека нема двојно гласање“.
Инаку, претседателот Стево Пендаровски доцна попладнето веќе го потпишал указот за прогласување на овој, како и на Законот за јавно обвинителство, за кои ВМРО-ДПМНЕ го повика да ги потпишува.
*поврзана вест Пендаровски ги потпиша и законите што ги оспорува ВМРО-ДПМНЕ