„Нови избори се единствениот начин да се овозможи здрав и отворен процес на донесување одлуки за иднината на Израел, во време кога толку многу Израелци ја загубија довербата во визијата и насоката на нивната влада“, рекол Чак Шумер, кој е највисоко рангираниот функционер во САД со еврејско потекло, во неговиот долг говор во Сенатот денеска, во кој упатил остри критики до израелскиот премиер Нетанјаху
Лидерот на мнозинството во Сенатот на САД, Чак Шумер го повика Израел да одржи нови избори, бидејќи според неговите уверувања израелскиот премиер Бенјамин Нетанјаху „го загубил патот“ со бомбардирањето на Газа и растечката хуманитарна криза во Појасот, пишува „Гардијан“.
Шумер, кој е највисоко рангираниот функционер во САД со еврејско потекло упатил остри критики до Нетанјаху во неговиот долг говор во Сенатот денеска.
Во неговите забелешки што ги пренесува Асошиејтед прес, Шумер рекол дека израелскиот премиер влегол во коалиција со екстремно десничарски политичари и партии поради што тој е подготвен да прифати висока стапка на жртви меѓу цивилното насление во Газа, што ја турка поддршката за Израел во светски рамки на историски најниско ниво.
„Израел не може да преживее ако стане парија (израз кој се користи за држава чија политика и закони се сметаат за неспоиви со стандардите на цивилизираниот свет н.з)“,
рекол Шумер.
Неговиот говор, како што забележува британскиот весник, доаѓа во период кога голем број демократи се противат на односот на Израел во Газа, а претседателот на САД, Џо Бајден се обидува да го засили притисокот врз владата на Нетанјаху, барајќи од него да обрне поголемо внимание на големиот број цивилни жртви во Газа.
САД месецов почнаа со достава на хуманитарна помош во Појасот од воздух, а најавија и дека работат на воспоставуавње поморска рута за доставување помош за што се планира изградба на привремено пристаниште во близина на крајбрежјето на Газа.
Шумер досега се позиционираше како силен сојузник на израелската влада и ја посети земјата само неколку дена по бруталниот напад од страна на Хамас на 7 октомври. Тој во декември одржа долг говор во Сенатот во кој го осуди „дрскиот и широко распространет антисемитизам, каков што ние не сум видел со генерации во оваа земја“.
Но, денеска пред Сенатот тој рекол дека израелскиот народ се гуши под водството на актуелната влада која „е заглавена во минатото“.
Шумер рекол дека Нетанјаху, кој долго време се спротивставува на палестинска државност, е една од неколкуте пречки на патот на решението за две држави што го туркаат САД. Тој, исто така, ги обвинил десничарските Израелци, Хамас и претседателот на палестинската управа, Махмуд Абас за актуелната ситуација.
Сè додека не бидат отстранети од равенката, рекол тој, „никогаш нема да има мир во Израел и Газа и на Западниот Брег“.
„Нови избори се единствениот начин да се овозможи здрав и отворен процес на донесување одлуки за иднината на Израел, во време кога толку многу Израелци ја загубија довербата во визијата и насоката на нивната влада“,
рекол Шумер.
Засега, пишува „Гардијан“, нема реакции и останува под знак прашалник како ќе биде примен невообичаено директниот повик на Шумер до Израел.
Следните парламентарни избори во Израел се очекуваат во 2026 година, но би можеле да се одржат и пред тоа.
Во кабинетот на Нетанјаху доминираат ултранационалисти кои го делат противењето на премиерот за формирање на палестинска држава и други цели кои последователните американски администрации ги сметаа како суштински за долгорочно решавање на палестинско-израелските конфликти.
Американската потпретседателка, Камала Харис, Шумер и други претставници на Конгресот минатата недела во Вашингтон се состанаа со Бени Ганц, кој е член на воениот кабинет на Израел и популарен ривал на Нетанјаху. Средбата наиде на негодување од страна на израелскиот премиер.
Ганц и се придружи на владата на Нетанјаху во воениот кабинет веднаш по нападите на Хамас, но се очекува тој да ја напушти владата откако ќе престанат најтешките борби. Прогнозите, исто така, се дека нови масовни демонстрации во Израел би можеле да го зголемат притисокот врз Нетанјаху и неговата коалиција да се согласи на предвремени избори.