Со пребројани резултати од 99% од избирачките места, симулацијата на Државната изборна комисија за распоредот на пратенички мандати по вчерашните парламентарни избори доживеа и мали промени. ДУИ, која во симулацијата со пребројани резултати од 95% од гласачките места имаше 16 пратеници, сега има 15 мандати а Левица доби еден пратеник, па сега има 2 мандати. Резултатот на останатите партии останува ист.
Според последната симулација, за која се уште постојат мали шанси да се смени, распоредот на силите во новиот парламент би бил:
СДСМ – 46 пратеника
ВМРО-ДПМНЕ – 44 пратеника
ДУИ – 15 пратеника
АА/А – 12 пратеника
Левица – 2 пратеника
ДПА – 1 пратеник
Според партиските пресметки – „фалат“ мандати кај СДСМ а има „вишок“ кај ДУИ?
Ваквата симулација веќе побуди голем број на реакции но и сомнежи и на социјалните мрежи, но и во партиските кругови. Она што е најевидентно е разликата на распоредот на мандати кој го објави ДИК и политичките партии.
ВМРО-ДПМНЕ избегна да каже колку мандати очекуваат. Но, лидерот на ДУИ кажа дека освоиле 12 мандати, што не е мало промашување од 15-те мандати кои сега им ги дава симулацијата на ДИК.
Од друга страна, лидерот на СДСМ Зоран Заев изјави дека нивните пресметки покажуваат дека освоиле 49 мандати, што повторно не е мала „утка“ споредено со 46-те мандати кои ги симулира ДИК. Но, во исто време, првиот човек на владејачката партија кажа и дека очекува ВМРО-ДПМНЕ да има барем три пратеника помалку од нив, што значи 46 или помалку, што повторно е подобар резултат од симулацијата на ДИК.