Од партијата сметаат дека демографската политика не може да се сведе на повици кон младите да формираат поголеми семејства, ниту на идеи како даночење на ергени, туку мора да биде проследена со создавање материјални услови за живот
Левица предлага државата да презема 20 отсто од преостанатиот станбен кредит на едно семејство за секое новородено или посвоено дете, со што станбената политика директно би се поврзала со справувањето со демографската криза.
Предлогот денеска на прес-конференција го презентираше пратеникот на Левица, Амар Мециновиќ, спротивставувајќи го ваквиот пристап на пораките од министерката за образование Весна Јаневска, која вчера, на првиот ден од новата учебна година, ги повика најмладите ученици – првачињата да побараат да стекнат братче или сестриче.
Според Мециновиќ, наместо апели до децата да бараат братче или сестриче, потребни се политики со конкретна материјална вредност.
Според предложениот модел, за секое новородено или посвоено дете државата би преземала по 20 отсто од преостанатиот долг за единствениот дом на семејството.
„За разлика од министерката Весна Јаневска, ние предлагаме 20 отсто за братче, 20 отсто за сестриче“,
порача Мециновиќ, оценувајќи дека Владата не го препознава демографското прашање како стратегиски интерес кој мора да се решава долгорочно.
Како аргумент за предлогот, тој посочи дека македонските домаќинства должат речиси две милијарди евра врз основа на станбени кредити, што, според изнесените податоци, претставува речиси 40 отсто од вкупните задолжувања на домаќинствата. Во една година станбениот долг пораснал за 273 милиони евра, а растот на станбеното кредитирање изнесува 16,6 отсто.
Мециновиќ посочи и на состојбите во образованието како показател за размерите на демографската криза. За една година има 433 паралелки и околу 3 000 првачиња помалку, 26 дополнително затворени училишта и вкупно 148 празни училишта.
Од Левица сметаат дека демографската политика не може да се сведе на повици кон младите да формираат поголеми семејства, ниту на идеи како даночење на ергени, туку мора да биде проследена со создавање материјални услови за живот.
Според Мециновиќ, основањето семејство не смее да значи ризик од сиромаштија и доживотна несигурност поради кредитни задолжувања.
„Демографската криза не се решава со апели, туку со создавање материјални услови преку долготрајни политики и силни инвестиции од државата“,
вели пратеникот.
На крајот од прес-конференцијата оцени дека одговорноста за условите во кои младите живеат и формираат семејства мора конечно да ја преземе државата.
Објаснувајќи ја нејзината порака до првачињата, во која ги повика да побараат да стекнат братче или сестриче, Јаневска во телевизиско гостување кажа дека немала намера никого да навреди, туку да алармира за демографската состојба во државата.