Истрагата, вели министерот е сосема при крај и се очекуваат потврди на одреди факти. Има и осомничени лица и веднаш откако ќе се потврдат некои детали, ќе се дадат насоки од обвинителството за понатамошно постапување
Министерот за внатрешни работи, Оливер Спасовски, серијата лажни дојави за бомби во училишта во Скопје ги окарактеризира како терористички акт.
Зборувајќи во емисијата „Само интервју“ на Канал 5 ТВ тој вели дека ова се хибридни напади кои знаат да бидат поопасни од конвенционалните, а целта е да предизвикуваат несигурност кај граѓаните, страв, паника, нестабилност во институциите.
„Пораките се со заканувачка содржина, дека во тоа и тоа училиште се поставени експлозивни направи. Се трошат и ресурсите на министерството. Најважно е што се предизвикува вознемиреност. Извршени се сите проверки, повторно станува збор за лажни дојави. Истрагата во овој дел е сосема при крај. Се очекуваат потврди на одредени факти и тоа се многу важни детали. Имаме лица кои се осомничени и веднаш со потврдувањето на фактите ќе се дадат насоки од обвинителството. Ова е терористички акт. Која и да е причината којашто внесува таков раздор и несигурност кај граѓаните, треба да биде најостро казнета“,
рече Спасовски.
Тој посочи дека ние не сме изолиран случај, туку повеќе држави се цел на ваквите напади, кои зачестија после руската агресија врз Украина.
Последната од серијата дојави за бомби беше денеска, откако претходно имаше „пауза“ од две недели. Дојави во текот на денешниот ден пристигнале во осумте средни скопски училишта:
„Раде Јовчевски-Корчагин“, „Орце Николов“, „Јосип Броз Тито“, „Панче Арсовски“, „Никола Карев“, „Владо Тасевски“, „Михајло Пупин“ и „Цветан Димов“.
За првпат денеска дојави имаше и во основни школи: „Кочо Рацин“ во Центар и „Петар Поп Арсов“ во Карпош 4.